سلێمانی... بۆ پاراستنی سیمای گەڕەكە كۆنەكان پڕۆژەی (TOR) ڕاگەیەنرا.

28/09/2019 - 10:42 بڵاوکراوەتەوە لە هەواڵ/كوردستانی

 

قائیمقامی قەزای مەڵبەندی سلێمانی ڕایدەگەیەنێت: وێنەی كۆتایی (تی ئۆ ئاڕ) تایبەت بە شێواز و سیمای گەڕەكە كۆنەكانی سلێمانی واژوو كرا و رەوانەی پارێزگار و ئەنجومەنی پارێزگای سلێمانی كرا بۆ پەسەند كردن و خستنە بواری جێبەجێكردنەوە.

 

قائیمقامی قەزای مەڵبەندی سلێمانی لە ڕاگەیەنراوێكدا كەوێنەیەكی دەست كوردیو كەوتووە ڕایگەیاند: ئەمرۆ لە دیوانی قائیمقامیەتی سلێمانی ئامادەكاری پرۆژەی (تی ئۆ ئاڕ)ی سلێمانی كرا تایبەت بە شێواز و سیمای گەڕەكە كۆنەكان كە نوێنەری شارەوانی و شوێنەوار و زانكۆی سلێمانی ئامادەی بوون.

 


قائیمقامی سلێمانیش ووتی: هەموو هەولێك دەدەن بۆئەوەی گەڕەكە كۆنەكانی سلێمانی بخەنەوە سەر شێوازە كۆنەكە و ئەو بابەتەیان بە گرنگ وەرگرتووە، دەستخۆشی لەو لیژنە ئەكادیمییەش كرد كە ماوەیەكی زۆر سەرقاڵی ئامادەكردنی پرۆژەی (تی ئۆ ئاڕ)ی سلێمانی بوون كە ئەم پرۆژەیە دەبێتە بنەمایەكی گرنگ بۆ كاری داهاتوومان و بەهەموو لایەك كاری لەسەر دەكەین.

 

لە كۆبوونەوەكەدا قائیمقامی سلێمانی و ئەندامانی لیژنەی ئامادەكاریی پرۆژەكە و ئەندامانی لیژنەی پاراستنی كەلەپوری سسەر بە لیژنە هاوبەشەكان واژوویان لەسەر وێنەی كۆتایی پرۆژەی (تی ئۆ ئاڕ)ەكە كرد و بە نوسراوی فەرمی ئاراستەی پارێزگار و ئەنجومەنی پارێزگای سلێمانی كرا بۆ پەسەند كردن و كارپێكردنی لەلایەن تەواوی لایەنە پەیوەندیدارەكانی شارەوە.

 

لە بارەی پرۆژەكەوە د. وشیار قادر- پرۆفیسۆر لە بەشی پلانسازی شار و مامۆستای زانكۆی سلێمانی رایگەیاند: ئەم پرۆژەیە لەلایەن ستافێكی ئەكادیمیییەوە كاری لەسەر كراوە و تەواوی وردەكاری خانوو و گەڕەكە كۆنەكانی سلێمانی تێدا تۆمار كراوە، لەهەمان كاتدا پێشنیاری تەواوی تێدایە بۆ ئەوەی لایەنە پەیوەندیدارەكان چۆن كار بۆئەوە بكەن سیما و شێوازی گەڕەكە كۆنەكان وەكو خۆیان بمێننەوە و بخرێنە سەر شێوازە كۆنەكەی.

 

هەروەها ووتیشی: لەو پرۆژەیەدا بە وردی باس لەوە كراوە لە ئێستە بەدواوە ئەو خانووانەی دروست دەكرێن یان نۆژەن دەكروێنەوە كام مواد لە دروستكردندا بەكار بهێنن، تەنانەت وردەكاری دەرگا و پەنجەرە و دیوارەكان و بەرزی باڵەخانەكانی تێدایە، بەجۆرێك باڵەخانەی بازرگانی نابێت لە سێ نهۆم و باڵەخانەی نیشتەجێبوون لە دوو نهۆم زیاتر بێت، روبەری خانووەكانیش (70%)ی روبەری زەوییەكە بێت، بەوەش ئەو گەڕەك و خانوانە دەخرێنەوە سەر شێوازە كۆنەكەی.

 

ئەلبوومی وێنەکان