هۆشداری دەدرێت، بۆ خزمەتگوزارییەك كرێ لەهاڵاتیان وەردەگیرێت

01/10/2019 - 11:40 بڵاوکراوەتەوە لە هەواڵ/كوردستانی


سەرۆكایەتی شارەوانی سلێمانی ڕایدەگەیەنێت: لە رێگەی كۆمپانیایەكەوە بۆ هەڵواسینی تابلۆی بازرگانی لە زۆنەكانی 2 و 3 دەست بە وەرگرتنی كرێ دەكرێت و تابلۆی سەر شۆستەو شوێنە گشتییەكان بە زیادەڕەویی دادەنرێت.

 

سەرۆكایەتی شارەوانی سلێمانی لە ئاگاداری نامەیەكدا كە وێنەیەكی دەست كوردیو كەوتوە، ڕایگەیاند: ئاگاداری هاووڵاتیانی شاری سلێمانی دەكەین كە كۆمپانیای (ئنسایت) هەڵدەستێت بە وەرگرتنی كرێی هەڵواسینی تابلۆی بازرگانی لە زۆنەكانی (٢ و ٣).

 

ئەوەشی خستەڕوو: بۆ ئەو مەبەستە سەرۆكایەتی شارەوانی سلێمانی هەموو خاوەن شوێنە بازرگانییەكان ئاگاداردەكاتەوە ماوەی (٢) دوو مانگیان لە بەردەستە لە (٢٠١٩/١٠/١ تاكو ٢٠١٩/١٢/١) بۆ لابردنی تابلۆی زیادە یاخود بچوكردنەوەی تابلۆكانیان گەر ویستی ئەوەیان هەبێت، بەپێچەوانەوە دوای تەواوبوونی ماوەی دیاریكراو مافی گۆڕانكاری نامێنێت و تیمەكانی كۆمپانیای ناوبراو هەڵدەستن بە پێوانەكردنی تابلۆ بازرگانییەكان و دانانی نرخ بۆیان.

 

ئاماژەی بەوەشكرد: هەموو ئەو تابلۆیانەی لەسەر شۆستەو شوێنە گشتییەكاندا دانراون بە زیادەڕەویی دادەنرێت بۆیە پێویستە لابدرێت.