سلێمانی... ماف بۆ ژمارەیەك كرێكاری دورخراوە دەگەڕێنرێتەوە

07/10/2019 - 14:49 بڵاوکراوەتەوە لە هەواڵ/كوردستانی

 

لیژنەی سەلامەتی كرێكاری سەر بە لیژنە هاوبەشەكانی قائیمقامیەتی سلێمانی ڕایدەگەیەنێت: لە ماوەی مانگێكدا 110 شوێنكاری بەسەركردووەتەوە و مافی بۆ ژمارەیەك كرێكاری دورخراوە گەڕاندوو تەوە.

 

لیژنەی سەلامەتی كرێكاری سەر بە لیژنە هاوبەشەكانی قائیمقامیەتی سلێمانی لە ڕاگەیەنراوێكدا كە وێنەیەكی دەست كوردیو كەوتووە ڕایگەیاند: لەماوەی مانگی 9ی ئەمساڵدا سەردانی 110 شوێنكار كراوە كە كرێكار كاری تێدا دەكات‌ و بەدواداچونی بۆ‌ چۆنێتی پاراستنی سەلامەتی گیانی كرێكاران و بوونی گرێبەستی یاسایی و پێدانی موچە بەپێی گرێبەستەكان و دابینكردنی شوێنی پشودان و خواردنی تەندروستیان كردووە.

 

ئاماژەی بەوەداوە: بەهۆی پێشێلكردنی یاسا و رێنماییەكانی كاركردن‌ 4 پسوڵەی سەرپێچی و 16 شوێنیان بەهۆی بونی سەرپێچی ئاگادار كردووەتەوەو لەسەر سكاڵای كرێكارانیش بەدواداچوون بۆ ژمارەیەك كێشەی كرێكاران كراوە و توانراوە موچه و ماف بۆ چەندین كرێكار بگەڕێندرێتەوەو ژمارەیەك كرێكاریش لەئەنجامی بەدواداچونی لیژنەكە گەڕێنراونەتەوە بۆ سەر كارەكانیان.

 

لیژنەی سەلامەتی كرێكاری سەر بە لیژنە هاوبەشەكان بەبەردەوامی سەردانی شوێنی كاری كرێكاران دەكات و رێنمایی پێویست دەدات بە كرێكاران لەبارەی مافەكانیان‌ لە هەمان كاتدا رێنمایی پێویست كە لە یاسا كارپێكراوەكاندا دیاری كراوە دەیدات بە خاوەن كارەكان.