زانكۆی پۆلیتەكنیكی سلێمانی وەڵامی ڕاپۆرتێكی ڕوداوو دەداتەوە

09/10/2019 - 10:45 بڵاوکراوەتەوە لە هەواڵ/كوردستانی


زانكۆی پۆلیتەكنیكی سلێمانی ڕونكردنەوەیەكی لەسەر ڕاپۆرتێكی رۆژنامەی ڕوداوو بڵاوكردەوەو ڕایگەیاند: چۆن و بە چی میكانیزمێك راپۆرتێكی نهێنی دەستی دەزگایەكی میدیایی دەكەوێت؟؟ لەوەش سەیرتر ئەوەیە، چۆن ئەو دەزگا میدیاییە (پرۆفێشناڵە) رێگە بەخۆی دەدات راپۆرتێكی نهێنی دەزگایەكی وەكو چاودێری دارایی بڵاوبكاتەوە.

 

دەقی ڕاگەیەندراوەكە:

رۆژنامەی (رووداو) لەژمارەی (573) لە 7\10\2019دا، راپۆرتێكی (دوورو درێژ!!)ی لەسەر راپۆرتێكی (نهێنی) چاودێری دارایی بڵاوكردۆتەوە، لەسەر زانكۆی پۆلیتەكنیكی سلێمانی، كە تیایدا هەندێ سەرنج و تێبینی ئەو دەزگایە دەخاتەڕوو لەسەر زانكۆی ناوبراو، لەلایەنی داراییەوە، سەرجەم ئەو خاڵانەی لەراپۆرتە نهێنییەكەی چاودێریدا هاتووە، شتگەلێكی زۆر سادەو ساكارن و دەست بەجێ لیژنەیەكی تایبەت لەلایەن سەرۆكایەتی زانكۆمانەوە دانراوە بۆ وەڵامدانەوەو رونكردنەوەی گشت ئەو تێبینی و سەرنجانە.
ئەوەی لێرەدا بەپێویستی دەزانین بۆ رایگشتی بخەینەڕوو، هەندێ خاڵی گرنگ و سەرسوڕهێنەرە لەسەر راپۆرتەكەی (رووداو) كە بە كورتی دەیانژمێرین:
1- جێگەی گومان و سەراسیمەبوون ئەوەیە، چۆن و بە چی میكانیزمێك راپۆرتێكی نهێنی دەستی دەزگایەكی میدیایی دەكەوێت؟؟ لەوەش سەیرتر ئەوەیە، چۆن ئەو دەزگا میدیاییە (پرۆفێشناڵە) رێگە بەخۆی دەدات راپۆرتێكی نهێنی دەزگایەكی وەكو چاودێری دارایی بڵاوبكاتەوە، بەبێ گەڕانەوە بۆ پرەنسیپە ئیتیكییە سەرەتاییەكانی رۆژنامەوانی، ئەمە جگە لەوەی بەرێز سەرۆكی حكومەت جەخت دەكاتەوە لەسەرئەوەی دەبێت تایبەتمەندێتی دەزگاكان حكومەت بپارێزرێت و هیچ سنورێكی یاسایی تێنەپەڕێندرێت، ئەمە وێڕای ئەوەی شێوازی دەستكەوتن و پێداگرتن لەسەر بڵاوكردنەوەی (بەو شێوەیەی كە خۆیان دەیانەوێت) بۆخۆی جێی گومان و لەسەر وەستانە!
2- ئەگەر ئەم راپۆرتە لەپاش دەستكەوتنی (بەهەر شێوازێك بێت) نیازی بڵاوكردنەوەیان هەبوایە، دەبوو وەك خۆیان لەكۆتاییدا نووسیویانە (پ.ی.د.ئالان فەرەیدوون سەرۆكی زانكۆی پۆلیتەكنیكی سلێمانی دەشڵێت: لیژنەیەكمان بەسەرۆكایەتی یاریدەدەری سەرۆكی زانكۆ بۆ كاروباری دارایی و كارگێڕی و چەند ئەندامێك پێكهێناوە بۆ وەڵامدانەوەی ئەو تێبینیانەی لەو راپۆرتەی دیوانی چاودێری دارایی هاتوون)، دەبوو چاوەڕێی وەڵامی ئەو لیژنەیە بكەن و دانبەخۆیاندا بگرن هەتا بەهەمان شێوازی دەستكەوتنی راپۆرتەكەی چاودێری دارایی، هەر ئاواش ئەمەیان دەستبكەوتایەو ئەوسا بەرامبەر بەیەك، یا بڵاویان بكردایەتەوە یان ویژدانیان بكردایە بەحەكەم، كە ئایا سەرجەم وەڵامەكان شوێنی خۆیان گرتووە یان نا؟ ئەگەر وابوو ئەوا دەستخۆشیان بكردایەو خۆ ئەگەر ناش، هەمیشە ئامادەین بۆ جێبەجێكردنی سەرجەم یاساو رێنماییەكان.
3- ئێمە نازانین، دەبێت چ دەرزگایەكی میدیایی هەبێت، كە خۆی بەخاوەنی میللەتەكەی بزانێت و كار بۆ بەرژەوەندییە باڵاكانی گەلەكەی بكات، كەچی بەشێوازێكی نالۆژیكییانە مامەڵە لەگەڵ دامەزراوەیەكی پیرۆزی وەكو زانكۆ بكات؟!
ئەمە لەكاتێكدا كە دەبوو لەجیاتی ئەو راپۆرتەی بۆ شكاندنی شكۆی زانست بڵاویكردەوە (بەحیسابی خۆی) دەبوو راپۆرتێكی لەسەر ئەم شتانە بكردایە:
1- لەماوەی بایكۆتی زانكۆو پەیمانگاكان و سەرجەم فەرمانگەكانی حكومەت، بۆ یەك چركەسات زانكۆمان لەدەوامكردن دانەبڕاوەو هەرگیز سەنگەری زانین و فێركردنی چۆڵنەكردووە.
2- رانكی زانكۆمان، كە لەبنەڕەتدا لەلیستی زانكۆ باشەكاندا نەبووە، هەنووكە یەكێكە لەزانكۆ رانك بەرزەكان، كە ئەمە جێی شانازییە پێش ئێمە بۆ (رووداو) كە دەبوو هەستی پیرۆزی كوردایەتی هانیان بدات بۆ خستنەڕووی ئەو راستیانە كە سەرجەمیان بۆ خزمەتكردنی خوێندكاران و مامۆستایان و فەرمانبەران و لەكۆتاییشدا كوردو كوردستانە.
3- خۆزگە (رووداو) راپۆرتێكی دەكرد لەسەر هەموو ئەو خزمەتگوزارییانەی پێشكەش بەبەشەناوخۆییەكان و دروستكردنی تاقیگەو هۆڵی خوێندن و برەودان بەلایەنی زانستی و ئەكادیمی و وۆرك شۆپ و كۆنفرانسی ناوخۆیی و نێودەوڵەتی و چاودێریكردنی سەرجەم كارو چالاكییەكانی كۆلێج و پەیمانگاكان، بەشە زانستییەكان، گۆڕانكاری لەپرۆگرامەكانی خوێندن، دروستكردنی رایەڵەی پەیوەندی لەگەڵ كۆمەڵگە، بەمەبەستی خزمەتكردنی چین و توێژە جیاوازەكان.
بەرێزان...
زانكۆمان سەرقاڵی بەرهەمهێنانی تاكی بەرهەمهینە بۆ ئەم گەلە ستەمدیدەیە كە ساڵەهایە تێدەكۆشێت بۆ دەستخستنی ئازادی و مافە سەرەتاییەكانی خۆی، زانكۆمان لەخەیاڵی ئەوەدایە كە گیانی بەرزەفڕی شەهیدان خۆشنودبكات، خزمەت بەكەسوكاری شەهیدان و پێشمەرگەی سەنگەرەكان و رۆڵەی ئەم گەلە بەشمەینەتە بكات.
زۆر كەناڵی میدیایی هەن كە بە (سوپاس)ەوە كارو چالاكییەكانی ئێمەیان خستۆتەڕوو، دەستخۆشیان لێدەكەین، زۆری تریش هەن كە ئامادەن ئەم كارە پیرۆزە بكەن، بەڵام داوا لەدەزگای میدیایی (رووداو) دەكەین كە بەوكارە پیرۆزە هەڵسن، مادەم نیازیان پاكەو ئەركی خزمەتكردنی میللەتی كوردیان گرتۆتە ئەستۆ.
زانكۆمان پابەندە بەو لیژنەیەی كە چاودێری دارایی داوایكردووەو وەڵامی سەرجەم سەرنجەكانیان بەخاڵ و بی كەموكوڕی دەدەینەوە.
بەهیوای هەمووان لەخزمەتی زانكۆو بەرزراگرتنی شكۆی زانست و زانیاریدابین.

زانكۆی پۆلیتەكنیكی سلێمانی
8\10\2019