وەزارەتی كارەبا هۆشداری دەداتە هاوبەشانی كارەبا

09/10/2019 - 17:00 بڵاوکراوەتەوە لە هەواڵ/كوردستانی

 

ووتەبێژی وەزارەتی كارەبا ڕایدەگەیەنێت: هاوبەشانی كارەبا ئاگادار دەكەینەوە بۆ ماوەی هەفتەیەك بڕی ناردنی غازی سروشتی و بەرهەمهێنانی كارەبا بە بڕی 450 مێگاوات كەم دەكات.

 

ووتەبێژی وەزارەتی كارەبا لە ڕاگەیەنرواێكدا كە وێنەیەكی دەست كوردیو كەوتووە ڕایگەیاند: هاوڵاتیان و هاوبەشانی كارەبا ئاگادار دەكەینەوە لە بەرواری 11-10-2019 هەتا 17-10-2019 كۆمپانیای دانا غاز بەسەرپەرشتی وەزارەتی سامانە سروشتیەكان هەڵدەستێت بە چاكسازی لە سیستەمی بەرهەمهێنانی غازی سروشتی لە كێڵگەی كۆڕمۆر وەكو ئامادەباشیەك بۆ وەرزی زستان بۆیە بۆ ماوەی هەفتەیەك بڕی ناردنی غازی سروشتی و بەرهەمهێنانی كارەبا بە بڕی 450 مێگاوات كەم دەكات.

 

ئاماژەی بەوەشداوە: وەزارەتی كارەبا هاوبەشانی دڵنیا دەكاتەوە لەنزیكەوە ئاگاداری بەڕێوەچوونی كارەكانە و تیمەكانی كۆنترۆڵی كارەبا سەرقاڵی خۆئامادەكردنن بۆ ئەوەی لەو ماوەیەدا ئەم پڕۆژەیە كەمترین كاریگەریی لەسەر ماوەكانی پێدانی كارەبا هەبێت.