ئیدارەی خۆبەڕێوەبەری ڕۆژئاوای كوردستان داوایەك ئاڕاستەی ڕایی گشتی دەكات

15/10/2019 - 12:43 بڵاوکراوەتەوە لە هەواڵ/كوردستانی

 

ئیدارەی خۆبەڕێوەبەری باكور و رۆژهەڵاتی سوریا ڕایدەگەیەنێت: زیاتر لە 275 هەزار هاوڵاتی مەدەنی ئاوارەبون، كە 70 هەزاریان منداڵن.

 

ئیدارەی خۆبەڕێوەبەری باكور و رۆژهەڵاتی سوریا لە بەیاننامەیەكدا كە ئاڕاستەی ڕایی گشتی كردووە، ڕایگەیاند:" دوای تێپەڕبوونی حەوت رۆژ بەسەر هێرشەكانی سوپای توركیا بۆ سەر ناوچەكانییان دۆخی مرۆیی بەرەو خراپی دەچێت و زۆرینەی رێكخراوە نێودەوڵەتییەكان كارەكان وەستاندوە و كارمەندەكانیان كشاندوەتەوە".

 

ئەوەشی خستەڕوو:" بەهۆی هێرشە داگیركارییەكانەوە تا ئەمڕۆ 275 هەزار كەس لە ناوچەكانی گرێ سپی و سەرێ كانی و دەوروبەری ئاوارەبون كە نزیكەی 70 هەزاریان منداڵان و ژمارەیەكی زۆریش بریندار پێویستیان بە دەرمانی پێویست هەیە، بەڵام بنكە پزیشكیەكان لە كاركردن وەستاون".

 

بەڕێوەبەرایەتی ئیدارەی خۆسەر بانگەوازێكی مرۆیی بەپەلەی ئاڕاستەی نەتەوەیەكگرتوەكان، یەكێتی ئەوروپا و كۆمكاری عەرەبی دەكات، بەخێرایی پێداویستی پزیشكی، لۆجستی و مرۆیی بگەیەننە ئاوارەكان و بەر لە دروستبونی كارەستی مرۆیی بگرن كە هۆكارەكەی هێرشەكانی توركیایە.