پولیسێن دهوکێ دەستەسەرکرنا تومەتبارەکی راگەهاند پارە ب فێلبازی ژ خەلکی د وەرگرتن

05/11/2019 - 23:25 بڵاوکراوەتەوە لە هەواڵ/كوردستانی

پۆلیسێن دهۆکێ دەستەسەرکرنا تۆمەتبارەکی ڕاگەهاند، کو فێلبازی ل وەلاتیان کرینە وب هێجەتا دانا دەلیڤێن کاری پارە ژ وان چێکرینە.

دوێ گرتەیەکا ڤیدیۆیی دا کو ڕێڤەبەریا پۆلیسێن دهۆکێ بەلاڤکریە و تێدا دیارکریە، تیمێن وان ب هەڤکاریا وەلاتیان تۆمەتبارەک دەستەسەرکرنە کو دبن ناڤێ ئەندازیاریێ و پێدانا دەلیڤەیێن کاری دا فێلبازی ل وەلاتیان کرینە و پارە ژ وان چێکرینە.

دیارکریە ژی، تومەتباری دان ب تاوانا خۆ دانایە و لگۆری بەندێ ٤٥٦ یێ یاسایێن سزای بۆ دادگەهێ هاتیە ڕەوانەکرن.

 

هەر د گرتەیا ڤیدیۆیی دا، پۆلیسان دانپێدانا تۆمەتباری دانایە و ئەو دبێژیت، "من ب هەڤکاریا کەسەکێ دی نێزیکی ١٠ کەسان بسەردا برینە و ب چەندین شێوەیان مە هەژمارێن تەلەفۆنێن خەلکی پەیداکرینە و دبن ناڤێ ئەندازیارێن کۆمپانیایا گازێ مە گوتیە وان دێ هەوە دامەزرینین".

تومەتباری گوت ژی "مە دگوتە خەلکی پێناسێن خۆ یێن کەسی و دگەل کۆژمەکێ پارەی بدەنە دەستێ مە، کو وی پارەی خۆ د ٤٠٠ بۆ ٥٠٠ دۆلاران دا ددیت، ب وی ڕەنگی مە دخاپاندن و پارە ژێ چێدکرن".