هەولێر...دەستدەگیریت بەسەر 10تەن خۆراكی بەسەرچودا، سێ كەس دەستگیر دەكرێن

06/11/2019 - 13:51 بڵاوکراوەتەوە لە هەواڵ/كوردستانی

 


لیژنە هاوبەشەكانی قایمقامیەتی هەولێر دەست بەسەر كۆگای كۆمپانیای زێڕی توركیدا دەگرن و 10 تۆن خۆراكی ئیكسپایەردە دۆزنەوە كە كۆمپانیاكە سەرقاڵی دەستكاریكردنی رێكەوتی بەسەرچوونەكەی بووە.


ئەمڕۆ چوارشەممە 6/11/2019 ، نەبەز عەبدولحەمید قایمقامی هەولێر ڕایگەیاند، قایمقایەتی هەولێر و لیژنە هاوبەشەكان دەستیان گرت بەسەر كۆگایەك لەسەر ڕێی گوێڕ، ئەو كۆگایە بەكۆگاكردنی خۆراك و خواردنی جۆراوجۆر و پاكەرەوە بەكار دەهات، بەپێی لێكۆڵینەوە سەرەتاییەكان سەرجەم ئەو خۆراك و خواردنەوانە ماوەیان بەسەرچووە، بەڵام لەڕێی تێكردنەوە و گۆڕینی ڕێكەوتی تازە ئامادە كراون و رەوانەی بازاڕەكان كراون.

قایمقامی هەولێر وتیشی"چەند كرێكارێك ددانیان ناوە بەو ڕاستییانە و ڕێكاری یاسایی گیراوەتە بەر، هاوكات لەسەر ئەم كەیسە سێ كەس گیراون و پەڕاوی لێكۆڵینەوەیان بۆ ڕێكخراوە و رەوانەی بەردەم دادوەری لێكۆڵینەوە كراون."

نەبەز عەبدولحەمید باسی لەوەش كرد "فەرمانی گرتن بۆ كەسێكی تر دەرچووە تا ئێستە نەگیراوە، بەدواداچوون بۆ ئەو كەیسە لەلایەن لیژنەكان بەردەوامە و تەندروستی هاووڵاتییان لەپێش هەموو شتێكەوەیە."

گرتنی ئەو كەسانە لە كاتێكدایە سەرجەم كاڵاكانیان بەرهەمی وڵاتی توركیایە و بە گۆڕینی ڕێكەوتی بەرهەمە بەسەرچووەكان لە بازاڕ ساغیان كردووەتەوە.