جوتیارێكی هەڵەبجە ٥٠٠ تۆن هەنار بەشێوەی سروشتی هەڵدەگرێت

20/11/2019 - 09:49 بڵاوکراوەتەوە لە هەواڵ/كوردستانی

بۆ برەودان بە بەرهەمی ناوخۆیی جوتیارێكی نمونەیی لە هەڵەبجە، بڕی ٥٠٠ تۆن هەنار بەشێوەیەکی سروشتی هەڵدەگرێت، بۆ ئەوەی لە کاتی نەمانی بەرهەمی هەناردا بیخاتە بازاڕەوە، ئەو جوتیارە دەڵێت: "ئامانج لەكارەكەم ئەوەیە بازاڕەكانی كوردستان خاڵی نەبێت لەبەرهەمی ناوخۆیی و چیتر هاوڵاتیان پێویستیان بە بەرهەمی دەرەكی نەبێت". 

 

ساڵانە لەگەڵ پێگەیشتنی بەرهەمە کشتوکاڵییەکانی جوتیارانی هەرێم، بەهۆی نەبوونی کۆگای تایبەت و ساردخانەوە، یەکێک لەو گرفتانەی ڕووبەڕووی جوتیاران دەبێتەوە، ئەوەیە کە ناتوانن بەرهەمەکانیان بۆ ماوەیەکی درێژ هەڵبگرن و بیهێڵنەوە، بۆ ئەوەی بەرهەمەکانیان لە خراپبوون بپارێزن، ئازاد محەمەد، جوتیارێكی نمونەییە لەسنوری پارێزگای هەڵەبجە و ماوەی دووساڵە بەشێوەیەکی گونجاو لە کاتی پێگەیشتنی هەناردا ئەو گرفتەی چارەسەرکردووە و وەک خۆی دەڵێت: ساڵی ڕابردوو سەدان تەن و ئەمساڵیش ٥٠٠ تۆن هەناری لەباخەكانی شارەزوورو هەڵەبجە بەشێوەیەكی سروشتی، هەڵگرتووە.

ئەو جوتیارە، کە تاکە جوتیاری هەرێمە ئەو بڕە زۆرە هەڵبگرێت، لەژێر چەندین کەپردا هەنارەکانی بەشێوازێکی تایبەت هەڵگرتووە، بەشێوەیەک ڕادەی شێی بۆ دروستكردوە، ئاو دەكات بەژێر هەنارەكاندا، لەتەنیشتی هەنارەكانیشەوە پوشی بۆ داناوە بۆ ئەوەی وشك نەبێتەوە و هەنارەکەش دەتوانێت بۆ ماوەی دوومانگ هەڵبگرێت بەبێ ئەوەی تێکبچێت.

 

ئازاد محەمەد، لەبارەی کارەکەیەوە له‌ لێدوانێكیشدا وتی: "چەند كەسێك هاتونەتە لام، هەنارەكەیان بەمێ‌ بۆ وڵاتی جۆرجیا، بەڵام بەهیچ جۆرێك پێیان نادەم ئەگەر كیلۆی ١٠ دۆلاریش بكات، حەز دەكەم بەرهەمی ناوخۆیی بازاڕەكانی كوردستانی پێ‌ پڕبكەمەوە نەك بازاڕەكانی دەرەوە".

داواشی لە حكومەتی هەرێم کرد و وتی: " ئەگەر بمانەوێت كەرتی كشتوكاڵ ببوژێنینەوە، یان وڵاتمان بە بەرووبوومی خۆماڵی پەروەردە بكەین، دەبێت حکومەت پشتی باخداران بەرزبكاتەوە، ئەگەر بێت و ئەو كارەش بكەین هەلی كاری زیاتر بۆ گەنجانی وڵاتەكەمان دەڕەخسێت، ئێستا ڕۆژانە ٣٠ بۆ ٤٠ كەس كار بۆمن دەكات".

 

ئەلبوومی وێنەکان