حكومه‌تی هه‌رێم گۆڕانكاری له‌ موچه‌دا ده‌كات

20/11/2019 - 14:29 بڵاوکراوەتەوە لە هەواڵ/كوردستانی
ئه‌ندامێكی "لێژنه‌ی دارایی" له‌ په‌رله‌مانی كوردستان رایده‌گه‌یه‌نێت: حكومه‌تی هه‌رێم ده‌یه‌وێت ده‌رماڵه‌ی زۆربه‌ی مامۆستایان و فه‌رمانبه‌ران و ده‌رماڵه‌ی خواردنی به‌شێكی زۆری هێزه‌ ئه‌منییه‌كان ببڕێت، ئه‌مه‌ش له‌ پڕۆژه‌ی چاكسازی مووچه‌و ده‌رماڵه‌و خانه‌نشینی جێگیركراوه‌.

سه‌ركۆ ئازاد گه‌ڵاڵی، ئه‌ندامی لێژنه‌ی دارایی په‌رله‌مانی كوردستان له‌ نووسنێكدا به‌ناونیشانی (گه‌ڕانه‌وه‌ی سیستمی پاشه‌كه‌وتی مووچه‌ له‌ژێر میكیاژی پڕۆژه‌ی چاكسازیدا) له‌ ئه‌كاوتنی تایبه‌تی خۆی له‌ فه‌یسبوك بڵاویكرده‌وه‌: یەكێك لە خەون و ئامانجە باڵاكەی ئێمە، كە ھەڵبژێدراین بۆ پەرلەمان، ئەوە بوو بتوانین خزمەتێكی زیاترو نەھامەتییەك كەمبكەینەوە و پاشەكەوتی مووچە بگەرێنەوە و شەفافیەت بچەسپێنین لەڕێگەی پڕۆژەیی چاكسازی.


ناوبراو ده‌شڵێت: بەتایبەت ئەوەی جێگای دڵخۆشی بوو ھەرسێ لایەنی سەرەكی پارتی و گۆڕان لەگەڵ یەكێتی، كە پێكھێنەری سەرەكی كابینەی حكومەتن، لە كارنامەی حكومەت و ھێڵە گشتییەكان ئاماژەی پێكرا.


ئاماژه‌ی به‌وه‌شكردووه‌: "ھەموو پەلەمان بوو، كە پڕۆژەی چاكسازی زوو بێتە پەرلەمان و زوو دەنگی پێبدەین بە جۆرێك بێت چاكسازی لە داھات و خەرجییەكان بكرێت، پڕۆژەكە گشتگیر بێت و ھەموو سێكتەركان بگرێتەوە، بەتایبەت ئەو سێكتەرانەی كە لە رابوردوو و ئێستاش زۆرترین گەندەڵی تێدا دەكرێت".


نوسیویشیه‌تی: "ھەوڵبدرێت شەفافیەت لە نەوت و چاكسازی لە خاڵە گومرگییەكان و پڕۆژەكانی وەبەرھێنان و پڕۆژەكانی ئاودانكردنەوەو رێگاوبان و رێگریكردن لە سپیكردنەوەی پارە و بە دادگاییگەیاندنی ئەوانەی چەكی پارەیان لە بریكاره‌كان ده‌كڕیه‌وه‌ بە نیوەی نرخەكەی لە حكومەت و پارەكەیان بە تەواوتی وەرئەگرت و چەندین ملیۆن دۆلاریان قازانج كرد و بۆ چارەسەری ئەمە چاكسازی لە سێكتەری سیستەمی بانكی بكرێت".


ده‌شڵێت: دەبوو پڕۆژە چاكسازییە پێشبینیكراوه‌كه‌ بودجە زەبەلاحەكانی ھەرسێ سەرۆكایەتییەكە نەھێڵێت یان بكرێت بە نیوەی ئێستا، خەرجی مانگانەی میوانخانەكان كەمبكرێیتەوە، ئەمانە ھەموو بەشێك بووە لەو گەندەڵخانەی كە لە پێشوودا دەسەڵاتدارانی حكومەتی ھەرێم كردبووی بە كەلتوور.

باسی له‌وه‌شكردووه‌"خەڵكی كوردستان و ھێزی پێشمەرگە و پۆلیس و ئاسایش و ناوخۆ و كارمەند و فەرمانبەرانی حكومی داوای دادپەروه‌ری لە خانەنشینی ده‌كه‌ن، كە ھیچ نەبێت وەك بەغدا كەمترین مووچەی خانەنشینی 450 بۆ 600 ھەزار دینار بێت و خانەنشینی پله‌ باڵاكان بۆ نیوە دابەزێت یان ھەر نەمێنیت وەك یاسای خانەنشینی یەكگرتووی عێراقی لێبكرێت، بۆ ئەوەی دادگەری بگەڕێتەوە بۆ خانەنشینان، "بەڵام ئەوەی ئێستا ئێمە زانیاریمان ھەیە لەسەر پڕۆژەكه‌، زۆر جیاوازە و لە پای بڕینی مووچە و نیوه‌ مووچە، موچەخۆران چاوەڕێی پاداشت بوون، حكومه‌ت ھاتووە بەناوی پڕۆژەی چاكسازی بڕیاریداوە بە سزادانی خەڵك و مووچەخۆرانی كەرتی گشتی لەڕێگەی بڕینی دەرماڵەی مامۆستا و كارمەندانی زانكۆ و كارمەندانی تەندروستی و لێكۆڵەرەوەی داد و ژمێریاران و وردبینان و تەكنیككاران و فەرمانبەرانی وەزارتی كارەبا، لە پاڵ ئەم توێژانەشدا ھەوڵێك ھەیە بۆ بڕینی دەرماڵەی خواردنی ھێزەكانی پۆلیس و وەزارتی ناوخۆ".


له‌ كۆتایی پۆسته‌كه‌یدا نوسیویه‌تی: "ئاخۆ بڕینی مووچەی مووچەخۆرانی ھەرێم چاكسازییە یان شەفافیەت لە داھاتی نەوت؟ كە سێ ساڵە وەزارتی سامانە سروشتییەكان سەرەڕای زیادبوونی ھەناردەی نەوت بۆ پێنج سەد ھەزار بەرمیل نەوت لە رۆژێكدا و سەرەڕای بەرزبوونەوی نرخی نەوت لە بازاڕەكانی جیھان، بەڵام بە درێژایی ئەم سێ ساڵە تەنھا 300 ملیۆن دۆلار بۆ وەزارتی دارایی دەنێرێت كە بریتیە لە داھاتی فرۆشتنی نەوت، دەكرێت چاكسازی لەم فەزاحەتە بكرێت یان بڕینی دەرماڵەی مامۆستایان؟".