شەپۆلێكی بارانی بەلێزمە بەڕێوەیە

01/12/2019 - 22:23 بڵاوکراوەتەوە لە هەواڵ/كوردستانی

ئەمڕۆ یەک شەممە ١ی کانوونی یەکەمی ٢٠١٩ به‌ڕێوه‌به‌رایه‌تى كه‌شناسى و بوومه‌له‌رزه‌ی هه‌رێمى كوردستان پێشبینییه‌كانى له‌باره‌ى شه‌پۆلێكى باران بارینى به‌لێزمه‌وه‌ راگه‌یاند و وتی" شەپۆلێكی فراوان هەرێمی كوردستان دەگرێتەوە".

 

سەرچاوەیەکی ئاگادار لە بەڕێوەبەرایەتی کەشناسی هەرێم ڕایگەیاند" شەپۆلێكی باران بارینی بەلێزمە بۆسەر ناوچەكانی باشوور و باشووری ڕۆژهەڵاتی هەرێم دەست پێدەكات، بەتایبەت باشوور و باشووری ڕۆژهەڵاتی پارێزگای سلێمانی، ئیدارەی گەرمیان، باشوور و باشووری ڕۆژهەڵاتی پارێزگای كەركوك".

 

سەرچاوەکە دەشڵێت" كاتی هاتنی شەپۆلەكە و باران بارین لە كاتژمێر ١٢ی ئەمشەو تاكو سبەی شەو كاتژمێر دوانزەی شەوی دووشەمە بەردەوام دەبێت".

 

هاوکات كەشناسی هەرێم لە ڕاپۆرتێكدا هۆشداری دەدات لە هاتنی شەپۆلێكی بەلێزمەی باران و وتەبێژی هاتووچۆی گەرمیان-یش ڕێنمایی بە شۆفێران دەدات.

 

لای خۆشییەوە ڕائید كارزان مەجید، وتەبێژی هاتووچۆی گەرمیان هۆشداری دەدات و ڕایدەگەیەنێت" داوا لە شۆفێران و هاووڵاتیان دەكەین، كە سبەینێ‌ ئەگەری كاری گرنگ و پێویستیان نییە بەرەو دەرەوەی شار و شارۆچكەكان ئۆتۆمبێل لێ‌ نەخوڕن، بەڵام ئەگەر زۆر پێویست بوو ئەوا پابەەندی ڕێنماییەكان بن و چێكی تەواوی ئۆتۆمبێلەكانیان بكەن".

 

كارزان مەجید جەختیشی كردەوە: كە پێویستە شۆفێران دەنگی تەسجیل كز بكەن و زیاتر گوێ‌ لە ڕادیۆی هاتووچۆ بگرن تاوەكو زیاترین ڕێنماییان پێ‌ بگات و جاروباریش جامی ئۆتۆمبێلەكان دابدەنەوە بۆ ئەوەی ئاگاداری ئەوەبن، كە لەدەرەوەی ئۆتۆمبێلەكەیان ڕوودەدات.

 

داواشی لە شۆفێران كرد، كاتێك لەناوشار ئۆتۆمبێل لێەخوڕن ڕێز لە پیادەكان بگرن، چونكە ئەوان لەبەر بارانن و خێراتر دەڕۆن و ڕادەكەن، بۆیە شۆفێران دەبێت ئاگاداریان بن.