فه‌رمانده‌ی گشتی یه‌به‌شه‌ لە بۆردومانی فڕۆکە جەنگییەکانی تورکیا گیانی لەدەست دا

15/01/2020 - 16:00 بڵاوکراوەتەوە لە هەواڵ/كوردستانی

بەرپرسێکی باڵای پارتی کرێکارانی کوردستان (پەکەکە) بەهۆی بۆردومانەکەی ئەمڕۆ چوارشەممە ١٥ی ١ی ٢٠٢٠ی سنووری شنگال، گیانی لەدەست دا.

 

ئیدریس زۆزانی، بەرپرسی راگەیاندنی لقی ١٧ی پارتی دیموکراتی کوردستان لە شنگال  رایگەیاند، ئەمڕۆ چوارشەممە، فڕۆکە جەنگییەکانی تورکیا بارەگایەکی پەکەکەیان لە ناوچەی (دووگری) لە سنووری شارەدێی سنوونێی سەر بە شنگال بۆردومان کرد.

 

ئەوەشی ئاشکرا کرد کە لە ئەنجامی بۆردومانەکەدا ١١ کەس گیانیان لەدەست داوە کە یەکێکیان ناوی (زەردەشت شنگالی)یە کە بەرپرسی یەکینەکانی بەرخۆدانی شنگال (یەبەشە - باڵی شنگالی پەکەکە) بووە.

 

ناوبراو بۆ  باسنیوز ئاماژه‌ی بەوەش کرد:" کە هەر لە بۆردومانەکەدا برایەکی زەردەشت شنگالی و دوو کەسی دیکەی خەڵکی شنگال گیانیان لەدەست داوە، چەند کەسێکی دیکەی سەر بە پەکەکەش کە هێشتا ناسنامەیان ئاشکرا نەکراوە و سەرجەمیان ١١ کەسن، گیانیان لە دەست داوە، جگە لە برینداربوونی ژمارەیەکی دیکە".

 

لە بارەی هێرشەکەوە، میدیای پەکەکە تۆمارێکی ڤیدیۆیی بڵاو کردووەتەوە و بانگەشەی ئەوە دەکات کە باڵاخانەیەک لە لایەن فڕۆکەکانی تورکیا بۆردومان کراوە، بەبێ ئەوەی ئاماژە بە ژمارەی کوژراو و بریندارانی هێرشەکە بکات، بەڵام هەروەک لە تۆمارە ڤیدیۆییەکەدا دەردەکەوێت، ئۆتۆمبێلێکی سەربازی بە تەواوی سووتاوە، ئەمەش نیشانی دەدات کە بارەگایەکی سەربازیی سەر بە پەکەکە کراوەتە ئامانج.

 

ئەم ناوچەیەی بۆردومان کراوە، دەکەوێتە سنووری دەسەڵاتی هاوبەشی نێوان پەکەکە و سوپای عێراق، بۆیە دوای بۆردومانەکە، هێزێکی سوپای عێراق بۆ لێکۆڵینەوە گەیشتوونەتە شوێنی ڕووداوەکە، هەروەک میدیای پەکەکە بڵاویان کردووەتەوە.

 

وێنەی زەردەشت شنگالی کە لە میدیاکانەوە بڵاو کراوەتەوە: