قائیمقامیەتی سلێمانی ڕوونكردنەوەیه‌ك بڵاوده‌كاته‌وه‌

18/01/2020 - 09:10 بڵاوکراوەتەوە لە هەواڵ/كوردستانی

دوای ئەوەی لەلایەن ئەندام پەڕلەمانێكەوە بڵاوكرایەوە، "لیژنەكانی تەندروستی و قائیمقامیەتی سلێمانی دەستیان بەسەر پاقلەدا گرتووه‌، كه‌ بە حەبی (پاڕاسیتۆڵ) كوڵێنرابێت"، قائیمقامیەتی سلێمانی له‌وباره‌یه‌وه‌ راگه‌یه‌ندراوێكی بڵاوكرده‌وه‌.

لە ڕاگەیەنراوێكدا قائیمقامیەتی سلێمانی ئاماژه‌ی به‌وه‌كردووه‌: پاش ئەوەی لەلایەن ئەندام پەڕلەمانێكەوە لەڕێی تۆڕی كۆمەڵایەتی فەیسبووك بڵاوكرایەوە، كە لیژنەكانی تەندروستی و قائیمقامیەتی سلێمانی دەستیان بەسەر پاقلەدا گرتبێت بە حەبی (پاڕاسیتۆڵ) كوڵێنرابێت، ڕەتیدەكەینەوە، كە هیچ حاڵەتێكی وەها لەلایەن لیژنەكانی قائیمقامیەتی سلێمانیەوە تۆماركرابێت و هیچ بڕە پاقلەیەكی كوڵاویش دەستی بەسەردا نەگیراوە.

باس له‌وه‌شكراوه‌:بەمەبەستی سەلامەتی تەندروستی هاوڵاتیان، ئەو خواردەمەنیانەی ڕۆژانە دەیكڕن و دەیخۆن، قائیمقامیەتی سلێمانی لەڕێی (38) لیژنەوە لەبەرەبەیانێكی زووەوە تا درەنگانێكی شەو چاودێری ووردی بازاڕو شوێنەگشتییەكان دەكات و سەرپێچیكاران سزا دەدات كەبە سزای ماددی دەستپێدەكات تاكو داخستنی شوێنەكە و ڕووبەڕووكردنەوەی خاوەنەكەی بەدادگا.

له‌كۆتایی راگه‌یه‌ندراوه‌كه‌ش ئاماژە بەوە كراوە: قائیمقامیەتی سلێمانی و لیژنەهاوبەشەكانی هاوڵاتیان دڵنیا دەكەینەوە چاوێكی كراوەدەبن و مكوڕدەبن لەسەر پاراستنی تەندروستییان.