سلێمانی... قەیرانی كەمی غاز بەردەوامە، هاوڵاتیان نیگەرانن

11/02/2020 - 11:31 بڵاوکراوەتەوە لە هەواڵ/كوردستانی

 

ئەمڕۆ سێ شەممە ژمارەیەك لە هاوڵاتیانی شاری سلێمانی بەهۆی كەمی و دەست نەكەوتنی غازەوە سەردانی غازفرۆشەكانی مامە ڕیشەیان كردو نیگەرانن لە نەبونی غاز.

 

سەرلەبەیانی ئەمڕۆ سێ شەممە ژمارەیەك لە هاوڵاتیانی شاری سلێمانی بۆ بەدەستهێنانی بتڵێك غاز ڕویان لە فلكەی مامە ڕیشە كرد و لە جەوێكی سارد و سەرما و سۆڵەدا سەرەیان بۆ وەرگرتنی ئەو بتڵەغازە گرت.

 

هاوڵاتیان ئەوانەی لەم شوێنە بەخۆیان و بتڵە غازەكانیان وەستابوون ، رایانگەیاند: شتێك نیە بە ناوی قەیرانی غاز بەڵكو حكومەت خۆی ئەم قەیرانەی دروستكردووە ، هەر رۆژەش دەڵێن لە شوێنێك غاز دابەشدەكرێت .

 

جێگەی باسە لەماوەی چەند ڕۆژی ڕابردوودا بەشێك لە بەرپرسانی حكومی باس لە كۆتایهاتنی قەیرانی غاز لە هەرێم دەكەن، بەڵام ڕۆژانە هاوڵاتیان ڕوو لە ناوەندەكانی فرۆشتنی غاز دەكەن بە مەبەستی بەدەستهێنانی بتڵێك غاز.