پۆلیسی هەولێر ڕاگەیەندراوێكی لەسەر برینداركردنی ئەو هاوڵاتیە بڵاوكردەوە كە لەمزگەوت هێرشیكرایەسەر

15/02/2020 - 14:43 بڵاوکراوەتەوە لە هەواڵ/كوردستانی

 

بەڕێوبەرایەتی پۆلیسی هەولێر ڕاگەیەندراوێكی لەسەر ڕوداوێكی هێرشكردنەسەر پیاوێكی بەتەمەن بڵاوكردەوەو بنەماڵەی بریندارەكەش هۆكاری هێرشكردنەكە ڕەتدەكەنەوەو ڕاشیدەگەیەنن: لەئێستادا تەندروستی ئەو هاوڵاتیە ناجێگیرە.

 

بەیانی ئەمڕۆ شەممە تۆمەتبارێك لە كاتی نوێژی بەیانیدا لە مزگەوتێكی شاری هەولێر، بە چەقۆ هێرشی كردە سەر هاوڵاتیەكی بەتەمەن و بریندار كرد، بەڕێوبەرایەتی پۆلیسی هەولێر لەسەر ڕوداوەكە بڵاویكردەوە كە ئەو تۆمەتبارە داوای پارەی لەو پیاوە بەتەمەنە كردوە و دوای ڕەتكردنەوەی داواكەی لە لایەن هاوڵاتیەكەوە، تۆمەتبارەكە چەند چەقۆیەكی وەشاندووە و بە سەختی برینداری كردووە.

 

سەرچاوەیەك لەبنەماڵەی هاوڵاتییە بریندارەكە تایبەت بۆ كوردیو ڕایگەیاند: هۆكاری ڕوداوەكە داواكردنی پارە نەبووە، ئەو تۆمەتبارە ماددەی بێهۆشكەری بەكارهێناوە،بەڵام تا ئێستا نازانین كە چ جۆرە ماددەیەكی بەكارهێناوە، جۆرە حەپێكی بێهۆشكەر بووە یاخود ماددەی كریستاڵ بووە.

 

ئەو سەرچاوەیە ووتیشی: لەلایەن تۆمەتبارەكەوە زیاتر لە 30 چەقۆ لەو پیاوە بەتەمەنە دراوەو لەئێستاشدا باری تەندروستی ئەو هاوڵاتیە ناجێگیرە.

 

 

هەمان سەرچاوە ئەوەشی خستەڕوو: دوای چەند كاتژمێرێك لەئەنجامدانی ڕوداوەكە قسەیان لەگەڵ تۆمەبارەكە كردووە، تۆمەتبارەكە ڕایگەیاندووە كە بەنیازی كوشتنی ئەو پیاوە بەتەمەنە بووە بەبێ ئەوەی بیناسێت.

 

هەروەها شایەتحاڵێكیش كە لەو كاتەدا لە ناو مزگەوتەكە ئامادەبووە، ڕایگەیاند: لەسەرەتای ڕوداوەكەوە كارمەندەكانی هێزەكانی ناوخۆ نەیانتوانیوە هێرشی تۆمەتبارەكە ڕابگرن تاوەكو داری كارەباییان بەكارهێناوەو بەو جۆرە توانیویانە دەستگیری بكەن و یەكێكیش لەكارمەندەكانی هێزەكانی ناوخۆ برینداربووە.