ئەمڕۆ مووچەی ئەم شوێنە دابەش دەکرێت

23/02/2020 - 09:14 بڵاوکراوەتەوە لە هەواڵ/كوردستانی

وەزارەتی دارایی و ئابووری هەرێم بەردەوامە لە دابەشکردنی مووچەی مووچەخۆران و فەرمانبەران، بەگوێرەی خشتەیەک ئەمڕۆ یەکشەممە ڕێکەوتی 2020/2/23 مووچەی وەزارەتی سامانە سروشتییەكان دابەش دەكرێت.

ئەگەرچی وابریاربوو ئەمڕۆ موچەی چەند وەزارەتێكی دیكە دابەش بكرێت ، بەڵام بەهۆی نەناردنی پارەی موچەی فەرمانبەران لەلایەنە حكومەتی عێراقەوە ، تەنها موچەی یەك وەزارەت دابەش دەكرێت.

هەرچەندە بڕیارە لە 5ی هەموو مانگێكەوە دابەشكردنی مووچە دەستپێبكات، بەڵام چەند مانگێكە دابەشكردنی مووچە چەند ڕۆژێك دوادەكەوێت و تا ئێستاش چارەنووسی 3 مووچەی پار ساڵ نادیارە.

وەزارەتی دارایی مانگانە بە دوو قۆناغ دەستبەدابەشکردنی مووچەی فەرمانبەران دەکات، قۆناغی یەکەم پشت بە داهاتی نەتی فرۆشراو دەبەستێت، قۆناغی دووەمیش لەو پارەیە دابەشدەکرێت کە لە بەغداوە دەگاتە هەرێمی کوردستان.