زانیاری نوێ لەسەر دابەشكردنی موچە بەبێ‌ پاشەكەوت

دوو شەممە, 10 تەمموز 2017 19:25

وەزارەتی دارایی ئامادەكاری بۆ دابەشكردنی موچەی فەرمانبەران بەپێی سیستمی بایۆمەتری دەكات و خەزێنەی هەولێریش داوا لەچەند فەرمانگەیەكی ئەو شارە دەكات، لیستی موچەی فەرمانبەران بەبێ پاشەكەوت رەوانە بكەن.
ڕێباز جەمال بەڕێوەبەری ژمێریاری لە بەڕێوەبەرایەتی گواستنەوەی كارەبای هەولێر بە میدیاكانی نزیك له‌ یه‌كێتی ڕاگەیاند:" لەسەرەتای ئامادەكارییەكان بۆ سیستمی بایۆمەتری موچە، بەڕێوەبەری ژمێریاری سەرجەم وەزارەت و بەڕێوەبەرایەتیەكان پێكەوە بەستراونەتەوەو لە نوێترین زانیاری ئاگادار دەكرێنەوە.

وتیشی: داوامان لێكراوە لیستی موچەی مانگی حوزەیران بەبێ پاشەكەوت ئامادە بكەین و رەوانەی گەنجینەكانی بكەین، بڕیاردانیش لەسەر دەستكاری موچەو دابەشكردنی بە سیستمی بایۆمەتری، بەدەست لیژنەكەی ئەنجومەنی وەزیرانە.

لای خۆشیەوە، ئاسۆ كەریم، جێگری بەڕێوەبەری خەزێنەی هەولێر، ڕاگەیاند:" پێشتر فەرمانگەكانمان ئاگاداركردۆتەوە كە لیستی موچە بەبێ‌ پاشەكەوت ئامادە بكەن و تا رۆژی 15ی ئەم مانگە، ئاراستەی خەزێنەی بكەن.