دارایی هۆكاری بڵاونەكردنەوەی خشتەی موچە ئاشكرا دەكات

یەک شەممە, 16 تەمموز 2017 20:06

 


سەرباری راگەیاندنی وادەی دابەشكدرنی مووچەی مانگی پێنج، بەڵام وەزارەتی دارایی هاوشێوەی مانگەكانی تر، خشتەی دابەشكردنی مووچەی سەرجەم وەزارەتەكانی بڵاونەكردەوە، بریكاری وەزارەتەكەش هۆكارەكەی بۆ نەبوونی پارەی پێویست دەگەڕێنێتەوە.

ئەمڕۆ 16-7-2017، رابەر سدیق بریكاری وەزارەتی دارایی و ئابوری بەوەكالەت، لەگەڵ بەڕێوەبەرانی گشتی خانەنشینی پارێزگاكان كۆبووەتەوە.

 

بەگوێرەی زانیاریيەكانيش، رابەر سدیق لە كۆبوونەوەكەدا ڕونكردنەوەی سەبارەت بەبڵاونەكردنەوەی خشتەی مووچەی مانگی ئایار داوەو رایگەیاندووە، بەهۆی بەردەستنەبوونی پارەی پێویست، نەتوانراوە بەهەمانشێوەی مانگەكانی ڕابردوو لەخشتەیەكدا وادەی دابەشكردنی مووچەی سەرجەم وەزارەتەكان ڕابگەیەنن.

 

لەزانیاریەكاندا ئەوەشخراوەتەڕوو، وەزارەتی دارایی بەڕەسمی خشتەیەكی نوێی موچە بڵاودەكاتەوە، بڵاوكردنەوەی ئەو خشتەیەش پەیوەستە بەو بڕە پارەیەی لەبەردەستی وەزارەتدایە، بەڵام لەدوو ڕۆژی داهاتوودا چاوەڕواندەكرێت خشتە نوێیەكە ڕابگەیەندرێت.

 

هەر بەگوێرەی زانیارییەكان، وەزارەتی دارایی بڕیاریداوە لەمەودوا لە 15-16ی مانگەوە دەست بەدابەشكردنی موچە بكرێت و تا كۆتایی مانگیش تەواوی دامودەزگاكان موچەیان پێبدرێت.

 

ئەمڕۆ وەزارەتی دارایی و ئابووریی حكومەتی هەرێم راگەیەنراوێكدا ئاشكرایكردووە، سبەینێ دوشەممە 17ی تەمموزی 2017، دەست بەدابەشكردنی مووچەی مانگی ئایار دەكرێت و سەرەتاش موچەی دیوانی وەزارەتی پێشمەرگەو و لیواكانی سەر بەو وەزارەتە دابەشدەكرێت.