رۆژا جیھانی یا لاوان ل دھوکێ ھاتە ساخکرن

شەممە, 12 ئاب 2017 21:30

کوردیو ـ دھوک ـ ئیبراھیم دێرگژنیکی

ل ژێر درویشمێ (ئاشتی ژبۆ پێکڤەژیانێ) و ب ئامادەبوونا (خالد دوسکی) وەزیرێ رەوشەنبیری و لاوان یێ ھەرێما کوردستانێ و (پیتەر ھاوکنس) بەرپرسێ ھەرێمی یێ رێکخراوا یونیسیف ل عیراقێ و ب پشکداریا چەندین رێکخراوێن جڤاکێ مەدەنی و ب بەرھەڤبوونا ھژمارەکا ئەندامێن جڤاتا پارێزگەھا دھوکێ و بەرپرسێن سازیێن میری و گەنج و لاوێن خوجە و ئاوارە، رۆژا جیھانی یا لاوان ل دھوکێ ب چەند چالاکیان ھاتە ساخکرن.


ل دەسپێکێ رێپیڤانا گەنجان ژبۆ ئاشتیێ ھاتە ئەنجامدان پاشی پێشانگەھا چالاکیێن لاوان ھاتە ڤەکرن و ل دویڤ دا برگا دیوارێ ھیڤی و ئومێدا ھاتە ئەنجامدان کو ھەر گەنجەکی ھیڤی و ئومێدێن خۆ دنڤیسین و د ھەلاویستن و پاشی رێورەسم ب چەند چالاکیان دەسپێکرن، ژ وانا چەند پەیڤ ھاتنە خواندن و پاشی پارچە موزیک و ستران ب زمانێن جودا ھاتنە پێشکێشکرن کو دەربرین ژ پێکھاتێن دھوکێ دکر و ل دویڤ دا کومەکا خوبەخشان پەیام و دەربرینێن خۆ پێشکێشی ئامادەبوویان کرن، پاشی شاھی و ستران ھاتنە پێشکێشکرن و شەمالک ھاتنە ھەلکرن و بەیانناما لاوان ب ڤێ ھەلکەفتێ ھاتە خواندن.

د بەیانناما رێکخراوێن جڤاکێ مەدەنی دا ھاتیە (بۆ بەرھەڤکرنا گەنجەکێ ئاشتیخواز پێویستە گەنج بھێتە ئاڤاکرن و پەروەردەکرن ل دور پرەنسیپێن مەدەنی و دیموکراسی و رێزگرتن لھەمی بھایێن مروڤایەتیێ و ئێکتر قەبولکرنا و ھەبوونا زمانێ لێبوردەیی و دویر ل دەمارگیری و توند و تیژیێ دا بکاریت گوھرینێن پوزەتیف د جڤاکی دا بکەت).

د ئالیەکێ دی یێ وێ بەیاننامێ دا رێکخراوان داخاز ژ حکومەتێ دکەن ئاریشێن گەنجان چارەسەر بکەن ژ وانا رێگری کرن ل کوچکرنا گەنجان ب رێکێن نە ساخلەم بۆ دەرڤەی وولاتی.

 

هه‌ژى  گوتنێ يه‌، سوباهى هه‌ر ب هه‌لكه‌فتا روژا جيهانى يا لاوان، رێكخراوا UPP يا ئيتالى ب رێكا سه‌نته‌رێن خۆ يێن گه‌نجان دێ ڤێ هه‌لكه‌فتێ ساخ كه‌ن، كو ل دويڤ به‌رنامێ وان ده‌مژمێر 11 ى به‌رى نيڤرو ل كه‌مپا دوميز و ل ده‌مژمێر  6ى ئێڤارى ل پاركا ئازادى. 

هه‌ر سوباهى  روژا ئێكشه‌مبي ل ده‌مژمێر 5ى ئێڤارى ل هولا سه‌نته‌رێ پێشمه‌رگه‌، رێكخراوا شانيا بۆ هاوسه‌رگيرى دێ سميناره‌كێ بۆ هه‌ر ژ هێژايان (دكتور جه‌مال كوچه‌ر و دكتور ئيسماعيل بامه‌رنى) ساز كه‌ت ل بن ناڤێ (پاشه‌روژا ته‌ يا دده‌ستێ ته‌ دا) و هاتن بۆ هه‌ميانه‌.

ا.د