کۆمسیۆنی باڵای ھەڵبژاردن، وادەی دامەزراندنی هەزاران کەسی بە شێوەیەكی كاتی راگەیاند

شەممە, 19 ئاب 2017 05:08

کۆمسیۆنی باڵای ھەڵبژاردن و ڕاپرسی لەھەرێم دەست بەقۆناغی دوەمی دامەزراندن لەکۆمسیۆنەکە دەکاتەوەو بەرپرسێکی کۆمسیۆنەکەش، وادەی ئەو دامەزراندنە ئاشکرادەکات.

كاروان جەلال بەڕێوەبەری گشتیی لەكۆمسیۆنی باڵای هەڵبژاردن و ڕاپرسی لەهەرێم ڕایگەیاندوە، "سێكتەری یەكەم بۆ دامەزراندن لەكۆمسیۆنەكە كۆتاییهات كە بریتیبوو لەدامەزراندنی كارمەند بەگرێبەست لەبنكەكانی تۆماری دەنگدەران".

وتیشی:"لەهەرێمی كوردستان 282 بنكەی تۆماری دەنگدەران هەیە كە بۆ هەر بنكەیەك شەش كەس دادەمەزرێت موچەكانیشیان بەگوێرەی كارەكانیان جیاواز دەبێت".

سەبارەت بەسێكتەری دوەمی دامەزراندنیش، كاروان جەلال ئاشكرایكرد، "بۆ ڕۆژی ڕیفراندۆم و هەڵبژاردنەكان، پێویستمان بەزیاتر لە 60 هەزار كەس دەبێت، چونكە دوو هەزارو 30 بنكەی دەنگدانمان دەبێت".

ئەوەشی ڕونكردەوە، "نزیكەی 12 هەزار وێستگەمان هەیە كە لەهەر وێستگەیەكدا پێنج كەس و لەهەر بنكەیەكی دەنگدانیشدا پێنج كەس پێویستە".

جەختی لەوەشكردەوە، لەڕۆژی (1ی ئەیلولی 2017) پڕۆسەی دامەزراندنی سێكتەری دوەم دەستپێدەكات و دەرگای دامەزراندنی كاتیی لەكۆمسیۆنەكە دەكرێتەوە.