ئەو لایەنە ئاشكرا بوو كە وێنەی مام جەلالی لە پۆستەرەكانی بەلێ بۆ ڕیفڕاندۆم بڵاوكردۆتەوە

یەک شەممە, 10 ئەیلول 2017 07:35

 


ئاڵا تاڵەبانی ئەندامی سەركردایەتی یەكێتی نیشتیمانی ڕایدەگەیەنێت بەكارهێنانی وێنەی مام جەلال لە ڕێفڕاندۆمی 25ی ئەیلول ڕەت دەكەینەوە و لێكۆڵینەوەش لە هەڵواسینی پۆستەرەكانی سلێمانی بە ئەنجام گەشتووە.


ئاڵا تاڵەبانی لە بەیاننامەیەكدا كە لە میدیا عەرەبیەكان بڵاوكراوەتەوە نوسیویەتی" دوای ڕۆژێك لە هەڵواسینی چەند پۆستەرێك كە وێنەی مام جەلالی تێدابووە لێكۆڵینەوەكان بە ئەنجام گەشتوون و ئەندامانی یەكێتیش ڕەتی دەكەنەوە كە بۆ مەرامی تایبەتی وێنەی سكرتێری گشتی بەكاربهێنن".


ئاڵا تاڵەبانی كە هاوكات برازای جەلال تاڵەبانیە دەڵێت" ئێستا هاوڵاتی زۆر لەوە وشیارترە و لەوە تێ دەگات ئەگەر ڕیفڕاندۆم بكرێت دەنگدەر نە دەنگ بۆ مەسعود بارزانی یان مام جەلال نادات و دژی مالیكی و عەبادیش دەنگ نادات بەڵكو دەنگ بە پرسێكی دیاری كراو دەدات".


ئاشكراشی كرد" دوای لێكۆڵینەوە دەركەوتووە كە ژووری عەملیاتی حیزبێكی دیاری كراو بە ڕەزامەندی ئەندامێكی مەكتەبی سیاسی یەكێتی و بێ ئاگاداری نوسینگەی سكرتێری گشتی پارە دراوە بە كۆمپانیای ( ئارج میدیا) لە بەرامبەر هەڵواسینی پۆستەرەكان و كۆمپانیاكەش ئاگادار نەبووە كە سكرتاریەت بەو پرسە ئاگادار نیە".