"ناكرێت پێش هاتنی ساڵی نوێی خوێندن گۆڕانكاری لە پاشەكەوتی موچەدا نەكرابێت"

چوار شەممە, 13 ئەیلول 2017 04:31

 

ئەندامێكی مەكتەبی سكرتاریەتی یەكێتی مامۆستایان داوا دەكات حكومەتی هەرێم بە خۆیدا بچێتەوە و دەست هەڵبگرێت لە سیاسەتی برسیكردن و بە شێوەیەكی شەفاف كارەكانی بەڕێبكات.

بەرهەم مستەفا ئەندامی مەكتەبی سكرتاریەتی یەكێتی مامۆستایانی كوردستان لەفەیسبوك بڵاویكردەوە: پێویستە كۆبونەوەكان بە ئاڕاستەی خۆدزینەوە نەبێت لە داوا رەواكانی مامۆستایان، كاری یەكەممان باشتركردنی ژیان و گوزەرانی مامۆستایان بێت، دەبێت هەنگاوەكان هۆشداری بن بۆ حكومەت لە پێناوی دوبارە نەبونەوەی بایكۆت و سەرخستنی پرۆسەی پەروەردە.


دەشڵێت، هۆكاری ئەو دۆخەی رویدا بێخەمی و بێمنەتی حكومەت بوو، ئێستاش ناكرێت پێش هاتنی ساڵی نوێی خوێندن هیچ گۆڕانكارییەك لە سیستمی پاشەكەوتی نایاسایی موچەی مامۆستایاندا نەكرابێت و موزایەدەشیان بەسەردا بكرێت.


ئاماژەشیكردوە، ئەم حكومەتە سەرچاوەی مەینەتیە بۆ خەڵكی كوردستان، پێویستە بەخۆیدا بچێتەوەو دەست هەڵبگرێت لە سیاسەتی برسیكردن و بەتاڵانبردنی وڵات و بەشێوەیەكی شەفاف كارەكانی بەڕێبكات.