گه‌نجێك گیانی لەدەستدا و باوكیشی بریندار بوو

چوار شەممە, 13 ئەیلول 2017 14:59

 

لەگوندێكی قەزای كفری، مێردمنداڵێك خۆی هەڵواسی و گیانی لەدەستدا، لەكاتی هێنانی بۆ نەخۆشخانەی باوكیشی تووشی روداوێكی هاتووچۆ دەبێت، وتەبێژی پۆلیسی گەرمیان زانیاری زیاتر ئاشكرا ده‌كات.

عەلی قەدوری وتەبێژی پۆلیسی گەرمیان رایگەیاند: ئێوارەی ئەمڕۆ 13ی ئەیلولی 2017، لەگوندی وەلی هەیەر سەر بەقەزای كفری مێردمنداڵێك بەناوی بیلال حەسەن غازی لەدایكبووی 2004 خۆی هەڵواسی و گیانی لەدەستدا.

له‌ راگه‌یه‌ندراوێكدا، وتەبێژی پۆلیسی گەرمیان وتیشی: لەكاتی هێنانی بۆ نەخۆشخانەی شەهید هەژار، باوكی مندڵەكەش تووشی رووداوی هاتووچۆ ده‌بێت.

پۆلیسی گه‌رمیان له‌ راگه‌یه‌ندراوه‌كه‌یدا ئاماژه‌ی به‌وه‌كردووه‌، ئەو مێردمنداڵەی خۆی هەڵواسیوە دانیشتووی قەزای كەلارەو لەگەڵ باوكی كە وەستای خانووە بەمەبەستی كاركردن چونەتە گوندی وەلی هەیەر لەكاتێكدا باوكی سەرقاڵی كاركردن بووە لەژورێكی ئەو خانووە، ناوبراو خۆی هەڵواسیوەو گیانی لەدەستداوە.

ئەوەش روونكراوەتەوە، باوكی منداڵەكە بەئۆتۆمبێلێكی جۆری داوێ لەدوای تەرمی كوڕەكەی بۆ قەزای كەلار هاتووەو خۆی بەدوو ئۆتۆمبێل كێشاوە لەئەنجامدا بەسەختی برینداربووە، دوای چارەسەری پێویست لەبەشی فریاكەوتنی شەهید هەژار لەكەلار بەهۆی سەختی برینەكەیەوە ڕەوانەی نەخۆشخانەی سلێمانی كرا.

لەئێستادا بەبڕیاری دادوەر یەكێك لەو شۆفێرانە بەپێی ماددەی 23ی هاتووچۆ بەندكراوەو خاوەنی ئەو خانووەش كە رووداوەكەی تێدا ڕوویداوە بەندكراوە.

وتەبێَژی پۆلیس گەرمیان راشیگەیاندووە، پۆلیس لەسەر ڕووداوەكە دەستی بەلێكۆڵینەوە كردووە.

 

 

 

 

ش.م