مه‌سعود بارزانی : دەرسێکیان پێ بدەن کە لە مێژوودا لەبیریان نەچێت

یەک شەممە, 15 تشرینی یەکەم 2017 23:40

کەمال کەرکووکی، بەرپرسی میحوەری رۆژئاوای کەرکووک، لەبارەی رەوشی کەرکووک و دەوربەری و ئەو دەنگۆیانەی لە میدیا عێراقییەکانەوە بڵاو دەکرێتەوە گوایە هێزە عێراقییەکان چوونەتە نێو چەند ناوچەیەک بە تۆڕی میدیایی رووداوی راگەیاند: "ئەسڵ و ئەساسی نییە، ئەوان تەنیا درۆی شاخدار دەکەن، وەکو هەموو جارێک ، پێشمەرگە سەربەرزەکان لە هەموو جێگایەک لەوپەڕی ئامادەباشیدایە، خەڵکی سەربەزی کوردستانیش لەگەڵ پێشمەرگەدایە، ئەوان هەوڵی ئەوە دەدەن بێنە پێشەوە".

سەبارەت بە دوایین پەیام کە لەلایەن مه‌سعود بارزانی وەکو فەرماندی گشتی هێزەکانی پێشمەرگە بە فەرماندەکانی پێشمەرگە درابێت، کەمال کەرکووکی، دەڵێ: "بەردەوام لە پەیوەندیدایە ئامۆژگاری ئەوە دەکات کە هێمن و ئامادەبن و دەستپێشخەری شەڕ نەبن، بەڵام ئەگەر هێرشیان بۆتان کرد دەرسێکیان پێ بدەن کە لە مێژوودا لەبیریان نەچێت".

بەرپرسی میحوەری رۆژئاوای کەرکووک پەیامێکیش ئاراستەی ئەو هێزانە دەکات، کە نیازی هێرشکردنە سەر کەرکووکیان هەیە و دەڵێ: "واز لەو بیرە نەخۆشەی خۆیان بهێنن، وادەزانن بە هێزی چەکدار دەتوانن خۆیان بەسەر ئیرادەی گەلی کوردستان بسەپێنن".

کەمال کەرکووک، دەشڵێت: "هەرچی لە توانامان بێت ئەنجامی دەدەین بۆ ئەوەی جارێکی دیکە بیر لە کاری وا نەکەنەوە".


ڕێبین عه‌لی