په‌رله‌مانتارێكی پارتی بۆ یه‌كێتی:"گروپه‌ خیانه‌تكاره‌كه‌تان خه‌ریكی خیانه‌تێكیترن و سه‌ری خۆتان ده‌خۆن"

هەینی, 15 کانونی یەکەم 2017 16:23

 

له‌سه‌ر روداوه‌كانی كه‌ركوك یه‌كێتی و پارتی به‌رده‌وام نامه‌ی ئاشكرا بۆ یه‌كتری ده‌نێرن و پرتسی به‌ خیانه‌تی گروپێكی ناویه‌كێتی ناوده‌بات و یه‌كێتیش روداوه‌كانی پێشتر بیرپارتی ده‌هێنێته‌وه‌و ده‌ڵێت: ئێوه‌ش ئه‌و خیانه‌تانه‌تان هه‌یه‌، په‌رله‌مانتارێكیش زه‌نگێكیتر بۆ یه‌كێتی لێ ده‌دات و ده‌ڵێت: هەمان ئەو گروپەی لە ١٦ی ئۆکتۆبەر خیانەتیان کرد, ئێستاش خەریکی فێیسی دووەمی خیانەتەکەیانن و ئەم جارە دەیانەوێت بە تەواوی سەری خۆیان و حزبەکەتان و یەک پارچەیی خاکی کوردستان بخۆن .

فرسه‌ت سۆفی، په‌رله‌مانتاری پارتی له‌په‌رله‌مانی كوردستان نامه‌یه‌كی بۆ یه‌كێتی ناردوه‌و له‌فه‌یسبوكی خۆی بڵاویكردۆته‌وه‌و نوسیویه‌تی: لە پێش خیانەتی ١٦ی ئۆکتۆبەر چەندین جار ئاگاداری هاوڕێکانمان لە ناو یەکێتی کردەوە کە جموجۆڵی هەندێ کەسی ناوحزبەکەتان نامۆیەو رایان بگرن, بەداخەوە پاساویان بۆ دەهێنانەوەو دڵنیاییان دەدا کە هیچ روو نادات, بەڵام ئەوەی نەدەبوو روو بدات روویدا.

نوسیویه‌تیشی: ئەو کات بە شاراوەیی پێمان گووتن ئەمرۆ بە کراوەیی پێتان دەڵێین هەمان ئەو گروپەی لە ١٦ی ئۆکتۆبەر خیانەتیان کرد, ئێستاش خەریکی فێیسی دووەمی خیانەتەکەیانن و ئەم جارە دەیانەوێت بە تەواوی سەری خۆیان و حزبەکەتان و یەک پارچەیی خاکی کوردستان بخۆن.

په‌رله‌مانتاره‌كه‌ی پارتی بۆ یه‌كێتی نوسیویه‌تیشی: ئێمە لە گەڵ ئێوە بە یەکەوە شەریکین لەم حکومەتەو ئێستاو داهاتووی کوردستانیش بە پلەی یەکەم ئێمە لێی بەرپرسیارین, چۆن رێگە دەدەن خیانەت کاران لە کەناڵە فەرمیەکانی ئێوە تەرویج بۆ پلانی دابەشکردنی کوردستان بکەن, چۆن رێگە دەدەن بە پارەو سامانی یەکێتی و دام و دەزگا ئەمنیەکان ناوماڵی کوردستان وێران بکرێت, تاکەی قبوڵتانە خاکی کوردستان بە نەوت و دەسکەوتی کاتی بگۆڕنەوە, خۆتان بینیتان لە دوای خیانەت تەنها سوپاس و ستایشیان پێبڕاو دوای ئەوەش کە کاریان پێیان نەما وەک دەستە سڕی پیس فڕێیان دان .

په‌رله‌مانتاره‌كه‌ی پارتی ده‌شڵێت: بێدەنگیتان لە ئاست ئەم پیلانە یان نیشانەی بێدەسەڵاتیە یان شەراکەتی خیانەت. من خۆم دڵینام ئێوە هیچ لەم دووانە نین, بۆیە چاوەڕێین ئەم جارە خۆتان سنور بۆ ئەمانە دابنێن و نەهێڵن یەکێتی نیشتمانی کوردستان و گەلی کوردستان باجی خیانەتی ئەم تاقمە بدات کە ژمارەیان زۆر کەمەو هەرگیز بەراوورد ناکرێن لە گەڵ قورسایی و گەورەیی حزبە تێکۆشەرەکەتان .

م-ع-كانی