فاملى مولا دهۆكێ لسه‌ر روویدانا شه‌ڤا سه‌رێ سالا رونكرنه‌ك دا

چوار شەممە, 03 کانونی دووەم 2018 14:43

دهۆك - ئاراز حسێن

ئه‌ڤرۆ رۆژا چوارشه‌مبى 3/1/2018 كارگێریا فاملى موولا دهۆكێ لسه‌ر روویدانا شه‌ڤا سه‌رێ سالێ ، كو دوو گه‌نج ژلایێ سكوێرێتیا موولێ ڤه‌ هاتبوونه‌ بریندار كرن ، روونكرنه‌ به‌لاڤكر .

كارگێریا فاملى موولا دهۆكێ راگه‌هاند : ل شه‌ڤا سه‌رێ سال پلانه‌ك ژ لایێ سكوێرێتیێ ڤه‌ هاتبوو دانان ژبوى كو دارا سه‌رێ سالێ بهێته‌ پاراستن ، لێ هنده‌ك گه‌نجان ڤیایه‌ ب زورى ب چنه‌ سه‌ر وێ دارى ، و ژلایێ تیمێن سكوێرێتیێ ڤه‌ رێگرى لێ هاتیه‌ كرن و به‌ره‌ڤانى ژ دارێ هاتیه‌ كرن ، لێ دبیت ئه‌و به‌ره‌ڤانیكرنه‌ ژ ئاستێ پێتڤى پتر بیتن .

كارگێریا موولێ ئه‌و یه‌ك ژى دا زانین كو : سكوێرێتیا موولێ ژلایێ كومپانیه‌كا بسپۆر ڤه‌ دهێته‌ برێڤه‌برن ، و ئه‌م و ئه‌و كومپانى ژى نوكه‌ د ڤه‌كولینان داینه‌ ، و لدویڤ دژواریا سه‌ره‌ده‌ریكرنێ پێرابوون دێ هێنه‌ وه‌رگرتن .

ل شه‌ڤا سه‌رێ سالێ ل فاملى موولا دهۆكێ دوو گه‌نج ژلایێ تیمێن سكوێرێتیا موولێ ڤه‌ هاتنه‌ لێدان و بریندار كرن ، و دیمه‌نێن ڤێ روویدانێ ب شێوه‌كێ به‌رفره‌ه د تورێن جڤاكى دا به‌لاڤبوون . پولیسێن پارێزگه‌ها دهۆكێ ژى ل رۆژا سێ شه‌مبى 2/1/2018 روونكرنه‌ك لسه‌ر ڤێ روویدانێ به‌لاڤكر ، و ده‌سته‌سه‌ركرنا تاوانبارێن ڤێ روویدانێ راگه‌هاند.

ا.د