ئەمریكا هێزێك بۆ پەیەدە دروست دەكات

هەینی, 12 کانونی دووەم 2018 08:41

 

 

بەپێی هەواڵێكی ئاژانسی ئەنادۆڵی توركی، بە پاڵپشتی ئەمریكا پەیەدە هەوڵی دامەزراندنی سوپایەك لە ژێر ناوی سوپای باكوور دەداو لە یەكەم هەنگاویشدا (400) كەس بۆ ئەو مەبەستە مەشقی سەربازیان پێ‌كراوە.

وەزارەتی بەرگری ئەمریكاو دەزگای هەواڵگری (CIA) لە یەكەم هەنگاوی دامەزراندنی هێزێكی نوێ لە پارتی یەكێتی دیموكراتی سوریا (پەیەدە) لە ‌ژێر ناوی (پارێزەری سنوور) مەشق و ڕاهێنانیان بە (400) ئەندامی یەپەگە لە نزیك بەنداوی تشرینی سەر ڕووباری فورات لە رۆژهەڵاتی حەلەب و كەمپی سەباحول خەیری باشووری حەسەكە كردووە.

ئەو (400) كەسەی مەشقی تایبەتیان وەرگرتووە، بۆ پێكهاتەكانی (YAT و HAT) گواستراونەتەوە وەك دوو یەكەی دژە تیرۆر كە پەیەدە لە (2014) دایمەزراندوون.

ئەمریكا بە پێدانی چەك و جبەخانەی شەڕ بە پەیەدە لە ساڵی (2016) ەوە و دانانی پلانی ڕاهێنانی تایبەتی سەربازی بە هێزەكانی یەپەگە، هەوڵی دروست كردنی سوپایەكی ڕێكخراو لەو حزبە دەدات.

بەپێی زانیارییەكانی ئاژانسی ئەنادۆڵ مەشقی تیمەكان لەلایەن پسپۆرانی ئەمریكییەوە ئەنجام دەدرێت و (CIA) و پنتاگۆن بۆ ئەو پێكهاتە نوێیە دوایین پێداویستی تەكنەلۆژیای بێ تەل، ویستگەی گوێگرتن و هێمای هەواڵگری بۆ پەیەدە دەگوازێتەوە.

ڕێكخراوی نوێی (YAT) كە لە لایەن ئەمریكاوە پرۆگرامیان بۆ كراوە، لای پارتی یەكێتی دیموكرات سوریا بە (سوپای باكوور) ناسراون و هەر لە ئێستاوە چاڵاكییەكان و لەوان گوێگرتن لە بنكەی پۆلیسی سنووری توركیایان دەستپێكردووە.

سوپای باكوور لە قۆناغی یەكەمدا ڕەوانەی ئەو ناوچانە دەكرێن كە لەلایەن رێكخراوەكەوە كۆنترۆڵ كراوەو هاوكات لەگەڵ دەوڵەتی سوریاش سنووریان هەیە لەوانە كۆبانێ، گرێ سپی، رەسولەین و مالیكیەو پاشان لەوێوە بەرەو شارۆچكەی عەفرین لەسەر سنووری سوریا دەگوازرێنەوە.

 

ئـ . كـ