كاتی دابەشکردنی مووچەی مانگی 10 ئاشكراكرا

پێنج شەممە, 18 کانونی دووەم 2018 13:42

 

وادەی بڵاوکردنەوەی خشتەیەکی نوێی موچە ئاشکرادەکرێت و موچەی خانەنشینانیش لەو خشتەیەدا بڵاودەکرێتەوە.

لەزاری سەرچاوەیەکی وەزارەتی دارایی و ئابوری حکومەتی ھەرێمەوە بڵاوكراوه‌ته‌وه‌: سەرەتای ھەفتەی داھاتوو ڕۆژانی "یەکشەممە، دوشەممەو سێشەممە" دابەشکردنی موچەی مانگی ١٠ی ساڵی ٢٠١٧ فەرمانبەران دەستپێدەکات و خشتەیەکی نوێی موچە بڵاو دەکرێتەوە.

سه‌رچاوه‌كه‌ بۆ تۆڕی هه‌واڵی سلێمانی وتویه‌تیشی: دوای کۆتاییھاتنی موچەی مانگی ١٠ی ساڵی ٢٠١٧ی فەرمانبەران، لەریزبەندی خشتەکەدا موچەی مانگی ۳ی ھەمان ئەو ساڵەی خانەنشینانیش دابەشدەکرێت .

پێشتریش مەولود سابیر، بەڕێوەبەری بانك لەوەزارەتی دارایی حكومەتی هەرێم وتبووی: بۆ دەستپێكردنی دابەشكردنی موچەی فەرمانبەران چاوەڕوانی هەفتەی داهاتوو دەكەن، "ئەگەر بەغدا لە 20 بۆ 25ی مانگ پارەی هەردوو وەزارەتی پەروەردەو تەندروستی بنێرێت، ئەوە وەزارەتی دارایی دەتوانێت بەئاسانی موچەی وەزارەتەكانی دیكە دابەشبكات".

ئەو بەرپرسە باڵایەی وەزارەتی دارایی ئاماژه‌ی به‌وه‌ش كردبوو: "ئەگەر بەغدا موچەی ئەو دوو وەزارەتە بنێرێت یان نەینێرێت، ئەوە لەدوای 20-1-2018 دەست بەدابەشكردنی موچەی فەرمانبەرانی هەرێم دەكرێت".

م-ع-كانی