پشووەكانی پەروەردە ئاشكراكرا

هەینی, 02 ئازار 2018 16:10

 

وەرزی خوێندنی ئەمساڵ تەنها یەك مانگی ماوە و بەپێی خشتەی پشووە فەرمییەكانی حكومەتی هەرێم نزیكەی 17 ڕۆژی وەرزەكەش بەر پشووی فەرمی دەكەوێت، بەڵام هێشتا لە زۆرێك لە خوێندنگەكانی سنوری سلێمانی، هەڵەبجە، گەرمیان و ڕاپەڕین بایكۆتە.

بەپێی خشتەی پشووە فەرمییەكانی حكومەتی هەرێم و وەزارەتی پەروەردە، 5ی ئازار بەبۆنەی یادی ڕاپەڕینەوە پشووە و پشووی بەهارە لە 11 بۆ 23/3/2018 (13 ڕۆژ)یه‌ و 9ی نیسان بەبۆنەی یادی ڕوخانی بەعس و 18ی نیسان بەبۆنەی جەژنی ئێزدییەكان و 1ی ئایار بەبۆنەی ڕۆژی جیهانی كرێكاران پشووە.


بەپێی خشتەكە كۆی گشتی پشووەكان 17 ڕۆژە، بەڵام تا ئێستا بەهۆی پێنەدانی مووچەی مامۆستایان لە كاتی خۆیدا لە زۆرێك لە خوێندنگەكانی سنوری سلێمانی هەڵەبجە و گەرمیان و ڕاپەڕین بایكۆتی خوێندنە.


ئه‌مه‌ش له‌كاتێكدایه‌ بەپێی خشتەی خوێندنی وەزارەتی پەروەردە، تاقیكردنەوەی پۆلە ناكۆتاكان لە 12ی ئایار دەستپێدەكات بۆ 21ی ئایار، بەڵام بە بڕیاری بەڕێوەبەرایەتی گشتی پەروەردەی سلێمانی، "بەهۆی ئەنجامدانی هەڵبژاردنەكانەوە تاقیكردنەوەكان پێشخراون".