ئەمساڵ بەخراپترین ساڵ دادەنرێت لەمێژووی بەهارو نەورۆزدا، بۆ بازاڕی قوماش

سێ شەممە, 06 ئازار 2018 06:27

 

ئەندامێكی ئەنجومەنی كارگێری ژووری بازرگانی ‌و پیشەسازی سلێمانی‌ ڕایدەگەیەنێت: ئەمساڵ خراپترین ساڵە لەمێژووی بەهارو نەورۆزی كوریدا بۆ بازاڕی قوماش و كەمترین قوماش هاوردەی بازاڕ كراوە.

 

عەتا حاجی رەجەب ئەندامی ئەنجومەنی كارگێری ژووری بازرگانی ‌و پیشەسازی سلێمانی‌ ڕایگەیاند:" ئەمساڵ ڕەشترین ساڵە لەمێژووی بەهارو نەورۆزی كوریدا بۆ بازاڕی قوماش، دەتوانم بڵێم ئەمساڵ بەراورد بەساڵانی رابردوو هاوردەكردنی قوماش لەسەدا ٨٠% دابەزیوە".

 

هەوەرها ووتیشی: لەساڵانی رابردودا بازرگانان لەمانگی 12ەوە كەل و پەل و كوتاڵیان دەهێنایە بازاڕەكانەوە بۆ ئەوەی لەنەوروز و بەهاردا خەرجی بكەن، بەڵام ئەم ساڵ باوەڕ ناكەم هیچ بازرگانێك توانیبێتی بڕێكی زۆر قوماش بهێنێت و بیخاتە بازارەكانەوە ئەوەی هەیە هی ساڵانی رابردووە.

 


عەتا حاجی رەجەب ئەوەشی خستەڕوو: لەساڵانی ٢٠١٣دا بەرگ دوورەكان لەمانگی دوەوە نەی دەتوانی یەك قات وەربگرێت ئەوەنە جل و بەرگی خەڵكی لابوو، بەڵام ئێستا كە ١٨ رۆژی ماوە بۆ نەورۆز، بچیتە لای هەر خەیاتێك بەزوترین كات جلەكەت بۆ دەدورێت لەبەرئەوەی بازاڕیان نیە.

 

ئەو ئەندامەی ئەنجومەنی كارگێری ژووری بازرگانی ‌و پیشەسازی سلێمانی‌ ئاماژەی بەوەش كرد: لەئێستادا نرخ بەردەوام لەدابەزیندایە كە كەل و پەل نەفرۆشرێت بازرگان ناچارە نرخ دابەزێنێت بۆ ئەوەی كاڵاكانی ببێتەوە بە پارە، قوماش هەرزانە بەڵام تێچوی دورینەكەی زۆرە و خەیات گرانە.

 

 

 

 

س ب