هەڵەبجە... داوای كردنەوەی بەڕێوبەرایەتی توندوتیژی ژنان دەكرێت

پێنج شەممە, 08 ئازار 2018 07:39

 

كوردیو ـ هەڵەبجە ـ حەیدەر حەمەساڵح 

 

سەرلەبەیانی ئەمڕۆ پێنج شەممە، رێكخراوی هاریكاری یاسایی ژنان و نوسینگەی هەڵەبجەی مافی مرۆڤ ‌ بە ئامادەبونی كاوە شێخ عەلی جێگری پارێزگاری هەڵەبجە، كەمپینێكی دروستكردنی فشاری لەپێناو كردنەوەی بەڕێوبەرایەتی توندوتیژی ژنان، ڕاگەیاند.

 

گوڵستان ئەحمەد لێپرسراونی نوسینگەی مافی مروڤ لەلێدوانێكیدا بۆ كوردیو ڕایگەیاند: رێكخراوی هاریكاری یاسایی ژنان و نوسینگەی هەڵەبجەی مافی مرۆڤ ‌كۆبونەوەمان بۆ دروستكردنی كەمپینێكی فشار ڕێكخست لەپێناو كردنەوەی بەڕێوەبەرایەتیەكی تایبەت بۆ كێشە خێزانیەكان كە تاوەكو ئێستا حكومەت نەیتوانیوە نوسینگەیەكی تایبەت بكاتەوە بۆ بەدواداچونی كێشە خێزانیەكان كە گرفتێكی گەورەی بۆ ژنان دروستكردوە لە پارێزگاكەدا .

 

هەروەها ڕاشگەیاند: تاكە نوسینگەیەك كە هەیە لە قەزای سەیدسادقە بۆیە نەبونی نوسینگەیەك یان بەڕێوەبەرایەتیەك لەهەڵەبجەدا وایكردوە كە ژنان و ئافرەتان بۆ تۆماركردنی كێشەكانیان سەردانی بەڕێوەبەرایەتی پۆلیس بكەن لێرەوە داوا دەكەین لە لایەنە پەیوەندیدارەكان كە وەك چۆن كاركراوە بۆ بەڕێوبەرایەتیەكانی دیكە ئاواش كار بۆ بەڕێوەبەرایەتی مافی مرۆڤیش بكرێت بۆیە فشارەكانمان فراوانتر دەكەین لەسەر لایەنە پەیوەندی دارەكان .

 

گوڵستان ئاماژەی بە ئامارەكانی توندو تێژی دژ بەژنان كرد و ڕایگەیاند: خۆشبەختانە لەسنوری پارێزگای هەڵەبجە ئامارەكانی توندو تیژی دژ بەژنان لە ئاستێكی زۆر لاوازدایە و دڵخۆشكەرە كەئەمەش بۆ بەرزی ئاستی ڕۆشنبیری هاوڵاتیانی پارێزگاكەو هەوڵو كۆششی ڕێكخراوەكان دەگەڕێتەوە .

 

 

 

 

س ب