نیگەرانە لە حیزبەكەی، بەرپرسێكی یەكێتی دەستی لەكاركێشایەوە

یەک شەممە, 18 ئازار 2018 09:36

 

ئەندامێكی ئەنجومەنی ناوەندی یەكێتی ڕایدەگەیەنێت: بەهۆی ئەوەی ئەنجومەنی ناوەندی یەكێتی لەلایەن سەركردایەتی و مەكتەبی سیاسی پشت گوێ خرا و بێ كاریگەر كراو كوردیان بەرەو هەڵدێر برد، دەستم لەكاركێشایەوە.

 

دیار موفتی ئەندامی ئەنجومەنی ناوەندی یەكێتی لەلاپەڕەی خۆی لەتۆڕی كۆمەڵایەتی فەیسبوك نوسیویەتی: بە داخەوە ئەنجومەنی ناوەندی یەكێتی لەلایەن سەركردایەتی و مەكتەبی سیاسی زۆر پشت گوێ خراو بێ كاریگەر كرا لەچەند بڕیار و دیدی كادیرانی پێشكەوتووی ئەنجومەنی ناوەند و هەموو بڕیارە ڕاست و دروستەكانی ئەنجومەنی ناوەند كرا بە قوربانی بەرژەوەندی تەسكی تایبەتی.

 

 

هەوەرها ئاماژەی بەوەش كرد: هەندێك كەسی سەركردایەتی و مەكتەبی سیاسی، یەكێتیی و كوردیان برد بەرەو هەڵدێری كاكی بە كاكی و هیچ ڕێزێكیان بۆ بڕیارەكانی ئەنجومەن نەگرت.

 

دیار موفتی ئەوەشی خستۆتەڕوو: هەر لە بڕیاری نەخشەڕێگاو بڕیاری نوێ بوونەوەی یەكێتیی لە كۆنگرەدا وهەروەها هیچیان بۆ خوێنی شەهیدان و فرمێسكی دایك و خوشكی شەهیدان و ئازار و ئەشكەنجەی زیندانیانی سیاسی نەهێشتەوە بۆیە من ناتوانم لە ئۆرگانێك كار بكەم بەدەستی ئەنقەست و بە بڕیاڕی هەندێ بێ كاریگەر بكرێ و ئەنجومەنی ناوەند كە خۆشەویستی كادر و لایەنگر و هەوادار و دەنگ دەرانی یەكێتیی بوو توشی شكستێكی بێ وێنەی بكەن و هەموو ئەو متمانە و هیواو ئاواتانە لە گۆڕ بنێن و من پێم وایە بە پلانی ووڵاتانی دوژمن پلانەكانیان لە ناوخۆی یەكێتی جێبەجێ كرد.

 

ئەو ئەندامەی ئەنجومەنی ناوەندی یەكێتی نوسیویەتی: یەكێتی و خوێنی شەهیدانیان كرد بە قوربانی ئارەزوو و بەرژەوەندیە تایبەتیەكانی خۆیان و كوردیش بێ چارە تر لە جاران بۆیە بە چاوی پڕ لە فرمێسكەوە بۆ خوێنی شەهیدانمان دەست لەكار كێشانەوەم لە ئەنجومەن و یەكێتیی قبوڵ بكەن.

 

 

 

 

س ب