وەزارەتی دارایی چەند بڕیارێك له‌باره‌ی موچه‌وه‌ ده‌رده‌كات

شەممە, 19 ئایار 2018 05:40

 وەزارەتی دارایی و ئابووری حكومەتی هەرێمی كوردستان چەند ڕێنماییەك سەبارەت بە پاشەكەوتی مووچە لە بەرژەوەندی فەرمانبەران دەردەكات و جەختیش لەسەر كارپێكردنی لەلایەن گەنجینەكانەوە دەكات.

 

بەپێی ڕێنماییەكی دارایی ژمارە (7)ی وەزارەتی دارایی هەرێمی كوردستان، كە رۆژی 5/4/2018 دەرچووە، ئاماژە بەوەكراوه‌، ئەگەر لە حاڵی پێدانی سەرمووچەی فەرمانبەرانی شارستانی لە ساڵی 2018 مووچەكانیان بە جۆرێك زیاد بێت، كە بێتە هۆی گۆڕینی ڕێژەی پاشكەوتیان ئەوە مووچەكانیان وەكو خۆی دەمێنێتەوە و ڕێژەی پاشەكەوتیان زیاد ناكرێت.


بەبڕیاری حكومەتی هەرێم و وەزارەتی دارایی لە ساڵی 2016-ەوە پلە بەرزكردنەوە ڕاگیراوە، بەڵام سەرمووچە بۆ فەرمانبەران دەبەسترێت.


هاوكات بەپێی ڕێنمایی دارایی ژمارە (9) كە رۆژی 25/4/2018 دەرچووە، وەزارەتی دارایی جەختی كردۆتەوە، ئەگەر لە ساڵی 2016 و2017  بە هەڵە یان بەهەر هۆكارێك بێت مووچە یان دەرماڵەی فەرمانبەران خەرج نەكرابێت ئەوە بۆیان خەرج دەكرێتەوە ب بێ ئەوەی ڕێژەی پاشەكەوتیان زیاد بكریێت.


هەر بەپێی ئەو ڕێنماییە، ئەوانەشی لە دوای 1/1/ 2018 بە هەڵە مووچە و دەرماڵەی زیادەیان پێدراوە ئەوە بە ڕێژەی 100% لە پاشەكەوتی مانگانەیان وەردەگیرێتەوە.