یەكێتی مامۆستایان وادەی دابەشكردنی موچەی مامۆستایانی ڕاگەیاند

دوو شەممە, 16 تەمموز 2018 08:17

 

كوردیو - سلێمانی


جێگری سەرۆكی یەكێتی مامۆستایانی كوردستان ڕایدەگەیەنێت: وەزارەتی دارایی بەڵێنیان پێداین بۆ مانگی داهاتوو قەرەبوی دواكەوتنی موچەی مانگی چوار بۆ موچەخۆرانی وەزارەتی پەروەدە بكرێتەوەو لە20ی ئەم مانگەش دابەشكردنی لیستی دووەمی موچە ڕادەگەیەندرێت.

 


مامۆستا عەتا ئەحمەد جێگری سەرۆكی یەكێتی مامۆستایانی كوردستان لە لێدوانێكی تایبەتدا بە كوردیو ڕاگەیاند: سەبارەت بەموچەی مامۆستایان كە بۆچی دابەشكردنی دوا كەوتوە لەلیستی دابەشكردنی موچەدا نەبوەو ئەو بەڵێنانەی پێشتر بە مامۆستایان درا جێبەجێ نەكرا، وەك سكرتاریەتی یەكێتی مامۆستایان سەردانی وەزارەتی داریمان كرد.

 


هەروەها ووتیشی: بەرپرسانی وەزارەتی دارایی هۆكاری دواكەوتنی دابەشكردنی موچەی وەزارەتی پەروەردەیان بۆ نەبونی پارە گەڕاندەوە كە ئەو بڕە پارەی لەبەردەست بوە بەشی وەزارەتی پێشمەرگەو چەند وەزارەتێكی تری دەكرد.

 


مامۆستا عەتا ئەحمەد ئەوەشی خستەڕوو: وەزارەتی داریی دڵنیایان كردین كە لەئێستادا بڕی پارەی پێویستە گەیشتۆتە هەرێم و  پێدەچێت  لە 20ی مانگ لیستی دووەمی موچە ڕادەگەیەندرێت و وەزارەتی پەروەردە یەكەم وەزارەت دەبێت.

 


سەبارەت بە دابەشكردنی موچەی مانگی پێنج، جێگری سەرۆكی یەكێتی مامۆستایانی كوردستان ئاماژەی بەوەكرد: وەزارەتی دارایی بەڵێنیان پێداین لە دابەشكردنی موچەی مانگی داهاتوو قەرەبوی دواكەوتنی موچەی ئەم مانگە بۆ وەزارەتی پەروەردە بكرێتەوە و دابەشكردنی موچەی مانگی داهاتو لەگەڵ موچەی ئەم مانگە چەند ڕۆژێكی كەمی دەبێت.

 

 

 

 

 

 

س ب