مونیرە عوسمان: باری داراییم ئاساییە، ناتوانم 48 ملیۆن دینارەكە ببەخشم

شەممە, 03 تشرینی دووەم 2018 11:16

 


پەرلەمانتاریێكی خولی چوارەم لەسەر فراكسیۆنی گۆڕان ڕایدەگەیەنێت ئەو بڕرە پارەیەی دوای خانەنشین بوون دەدرێت بە پەرلەمانتاران بە یاسا ڕێكخراوەو دوپاتیشی دەكاتەوە باری دارایی ئەو متەوازی ه بۆیە ناتوانێت ئەو پارەیە ببەخشێت كە وەریدەگرێت.


لە میانەی ڕونكردنەوەیەكدا مونیرە عوسمان لە فراكسیۆنی گۆڕان نوسیویەتی" ئێمە لەماوەی ئەو دووخولەدا، كە بەشدار بووین لەپەرلەمان، هەوڵی زۆرمان داوە لەڕێگەی پێشكەشكردنی پڕۆژە یاساوە بۆ هەمواركردنی ئەو یاسایە، كە نادادپەروەری زۆری تێدایە ، بەجۆرێك جۆرێك لەدادپەروەری هەبێت لەموچەدا ، كەمكردنەوەی موچەی پلە بڵاكان و زیادكردنی موچەی فەرمانبەرانی ئاسایی‌و خانەنشینان، بەڵام بەداخەوە سەركەوتوو نەبووین و بەزۆرینە لەلایەن دەسەڵاتەوە ئەوان سەركەوتوو بوون ".


ئەو دەڵێت" شەڕی گەورەی ئێمە وەك گۆڕان لەسەر دادپەروەری بووە لەماوەی هەردوو خولەكەدا، بەڵام ئەوان بەزۆرینە لەئێمەیان بردووەتەوە،باشە ئێمە چی بكەین".


سەبارەت بە دەنگۆی بەخشینی ئەو پارەیەی وەریدەگرن لەلایەن فراكسیۆنی گۆڕانەوە، مونیرە عوسمان دەڵێت: لێرەدا دەمەوێت ئەوە ڕوونبكەمەوە، كە لەهەندێك پەیجی ساختەو ئەكاونتی هەندێك هاوڕێشەوە، كە لەو پەیجانەوە هێناویانە، كە گوایە ئێمە ئەو ئیكرامیە دەدەین بەنەخۆشخانەی هیوا، من بۆ خۆم تەمەنام دەكرد، كە وەزعی داراییم باش بوایە بەردەوام هاوكاری ئەو شوێنانەمان بكردایە، بەڵام بەداخەوە وەزعی دارایی من زۆر موتەوازیعە، كە ناتوانم ئەو هاوكارییە بكەین".