پێشبینی بۆ زستانی ئەمساڵی كوردستان بەم جۆرەیە

هەینی, 30 تشرینی دووەم 2018 05:58

 

 

شارەزایەكی كەشناسی كوردستان رایگەیاند، ئەمساڵ زستانی كوردستان لە ئاستی نۆرماڵ بەرزتر دەبێتەوەو ساڵێكی پڕ لە بەفرو باران دەبێت.

(بەهرام چارەخوا) شارەزا لەبواری كەشناسی لەخۆرهەڵاتی كوردستان سەبارەت بە بارینی بەفرو باران لە زستانی ئەمساڵدا بۆ ئاژانسی میهر وتی: پێش بینی ئێمە ئەوەیە كە زستانی كوردستان تاكوو مانگی خاكەلێوە زیاتر لە ئاستی نۆرماڵ بێت.

ئەو باسی لەوەشكردووە، نۆرماڵی باران بارین لە شارەكانی سنە، مەریوان، بانە، كامیاران و قوروە (121) ملی مەتر، (64) ملی مەتر، (93) ملی مەترو (53) ملی مەتر بووە كە چاوەڕوان دەكرێت ئەم ڕێژەیە ئەمساڵ بەرزتر ببێتەوە.

ئەم شارەزای كەشناسییە وتیشی: پێش بینییەكان (70%) دێتە دی و هەر مانگ نوێ دەكرێتەوە، بەڵام بە هۆی گۆڕانكاری هەرێمی و كەش و هەواوە ئەگەری هەرجۆرە گۆڕانكارییەك هەیە، بۆ نموونە پێش بێنی دەكرێت بە نیسبەت ساڵانی ڕابردوو پلەی گەرما لە زستانی ئەمساڵ (1) پلە بەرز بێتەوە كە ئەگەر ئەمە بێتە دی خۆی كاریگەری دەبێت لە سەر گۆڕینی بەفر بۆ باران.

چارەخوا سەبارەت بە هەفتەی داهاتوو وتی: تاكوو هەفتەی داهاتووش شەپۆڵێكی باران بارین ئاسمانی شارە كوردییەكان دەگرێتەوە كە ڕەنگە لە بەرزاییەكان بیكاتە بەفر.

 

 

ئـ . كـ