لەمانگی داهاتووەوە مووچەی ئەم توێژە بەبێ پاشەكەوت دابەشدەكرێت

هەینی, 07 کانونی یەکەم 2018 14:10

 

 

 

مووچەی بەشێك لەكەمئەندامانی سەنگەر لەهەفتەی داهاتووەوە راستدەكرێتەوەو بەرپرسێكی وەزارەتی پێشمەرگەش رایدەگەیەنێت: ئەو كەمئەندامانەی سەنگەر كە رێژەی كەمئەندامییەكەیان (100%)ە، لەهەفتەی داهاتوەوە مووچەكەیان رێكدەكەینەوەو لەمانگی داهاتووشەوە بەبێ پاشەكەوت مووچەیان پێدەدرێت.

(فەتحولڵا سوسێی) جێگری بەڕێوەبەری گشتی خانەنشینی پێشمەرگەو كەمئەندامانی سەنگەر لەوەزارەتی پێشمەرگە رایگەیاند: پڕۆسەی پشكنین بۆ كەمئەندامانی سەنگەر بەردەوامەو تائێستا نزیكەی (6800) كەس پشكنینان بۆ كراوەو نزیكەی (2) هەزاریان ماوە.

وتیشی: ئەگەر لەم هەفتەیەدا ئەنجوومەنی وەزیران وەڵامی نوسراوەكەمان بداتەوە، لەم هەفتەیە ئەنجامی ئەوانە رادەگەیەنین كە پشكنینیان بۆ كراوەو لەكۆی ئەو (6800) كەمئەندامەی سەنگەر، (35%) یان دەرنەچوون.

ئاماژەی بەوەشكرد، بەپێی ئەو نوسراوەی بۆ ئەنجوومەنی وەزیران كراوە، ئەوانەی دەردەچن لە لێژنەی پشكنین، هاوشێوەی وەزارەتی پێشمەرگە پاشەكەوت لەمووچەكەیان دەكرێت.

جێگری بەڕێوەبەری گشتی خانەنشینی پێشمەرگەو كەمئەندامانی سەنگەر بۆ ئێس ئێن ئێن وتی: ئەو كەمئەندامانەی سەنگەر كە رێژەی كەمئەندامییەكەیان (100%) ە، واتە دوو ئەندامی جەستە (دوو چاو، دوو دەست، دوو قاچ) یان لەدەستداوە، مووچەكەیان بەتەواوی و بەبێ پاشەكەوت پێدەدرێت.

وتیشی: لەهەفتەی داهاتوودا مووچەی ئەو كەمئەندامانەی سەنگەر راستدەكەینەوە كە رێژەی كەمئەندامییەكەیان (100%) ەو ژمارەیان (130) كەمئەندام دەبێت، لەمانگی داهاتووشەوە مووچەی تەواویان پێدەدرێت بەبێ پاشەكەوت.

 

 

ئـ . كـ