بەڕێوەبەری بەنداوی دەربەندیخان: 60 ساڵە باران بەمشێوەیە نەباریوە

10/12/2018 - 12:52 بڵاوکراوەتەوە لە هەواڵ/كوردستانی

 



بەڕێوەبەری گشتی بەنداوی دەربەندیخان ڕایدەگەیەنێت: بە هۆی بەردەوامی باران بارین لە میانی ئەم چوار رۆژەی دواییدا بڕێكی زۆر ئاو گەیشتووەتە ناو بەنداوەكەوە و لە ماوەی 60 ساڵی ڕابردوودا ئەوەندە باران نەباریوە.

 

رەحمان خانی بەڕێوەبەری گشتی بەنداوی دەربەندیخان ڕایگەیاند:" تەنها لە میانی ئەم چوار رۆژەی رابردوودا لە بەنداوی دەربەندیخان 180 ملم باران باریوە و كۆی گشتی باران بارینی ئەمساڵی گەیاندە 390 ملم، ئەوەش حاڵەتێكی دەگمەنە و تەنها ساڵی 2015 نەبێت لە میانی 60 ساڵی رابردوو بەنداوەكە باران بارینی وای بەخۆوە نەبینوە".

 

بەڕێوەبەری گشتی بەنداوی دەربەندیخان كە بە ئاژانسی ئەنادۆڵی ڕایگەیاند وویشی:" ئاستی ئاوی بەنداوەكە زۆر زیادی كردووە و لە میانی سێ‌ رۆژدا، 108 ملیۆن مەترسێجا ئاو هاتووەتە بەنداوەكە، بەو هۆیەشەوە ئاستی ئاو یەك مەتر و 75 سم زیادی كردووە و بەردانەوەی ئاویش لەم رۆژانەدا، 45 ملیۆن مەترسێجا بووە، هەروەها بەرهەمهێنانی وزەی كارەباشمان زیادی كردووە و زیاتریشی دەكەین لەم رۆژانەدا".

 

بە هۆی بوومەلەزەكەی مانگی 12ی ساڵی رابردوو، بەنداوەكە رووبەڕووی زیان و مەترسی بوویەوە، بەو هۆیەوە بڕێكی زۆر ئاوی بەنداوەكە بەردرایەوە، رەحمان خانی لەو بارەیەوە ئاماژەی بەوەكرد: "بە هۆی كێشەكانی بوومەلەرزەكەوە ئەمساڵ ئاستی ئاوی بەنداوەكەمان دابەزاند و نزیكەی 15 مەتركەمتر لە ئاستی خۆی ئاو گل دەدەینەوە، ئەوەش وای كردووە ئەمساڵ توانای وەرگرتنی بڕێكی باش ئاومان هەبێت و مەترسی ئەوتۆ لەسەر بەنداوەكە دروست نەكات".

 

بەڕێوەبەری گشتی بەنداوی دەربەندیخان، رەحمان خانی باسی لەوەش كرد، كاركردن بۆ چاكسازی لە بەنداوەكە و نۆژەنكردنەوەی و چاككردنەوەی ئەو زیانانەی بە هۆی بوومەلەرزەوە پێی گەیشتووە دەستیپێكردووە و بەشێكی تەواوبوون، ئەوەی ماوەی پێویستی بە كۆمپانیای راوێژكاری بیانی هەیە و حكوومەتی عێراق بۆ ئەو مەبەستە لەگەڵ كۆمپانیا بیانییەكان لە گفتوگۆدایە.

 

بەنداوی دەربەندیخان دەكەوێتە قەزای دەربەندیخانبە دووری 66 كلم باكووری رۆژهەڵاتی سلێمانی، ئەم بەنداوە لە ساڵی 1961 دروستكراوە و توانای گلدانەوەی دوو ملیار و 600 ملیۆن مەترسێجا ئاوی هەیە.

 

 

 

 

س ب