به‌فیشه‌ك هاوڵاتیه‌ك ده‌كوژرێت و دووكه‌سیش بریندار ده‌بێت

سێ شەممە, 18 کانونی یەکەم 2018 11:18

شه‌وی رابردوو له‌سه‌ر رێگای كه‌ركوك - سلێمانی، لە رووداوێکی تەقەکردندا لە ناحیەی قەرەهەنجیری سەر بە پارێزگای کەرکوک،  هاوڵاتییەک کوژرا و دوو کەسی دیکەش برینداربوون.

(ئاڤێستا شێخ محەمەد) بەڕێوەبەری ناحیەی قەرەهەنجیر رایگەیاند: درەنگانی شەوی رابردوو لەسەر رێگای کەرکوک – سلێمانی لەناو ناحیەی قەرەهەنجیر، تەقە  لە نێوان سەرنشینانی دوو ئۆتۆمبێلدا روویداوە،لە ئەنجامی ئەو تەقەکردنە سێ سەرنشینی یەکێک لە ئۆتۆمبێلەکان برینداربوون.

ئه‌وه‌شی ئاشكرا كردوه‌، بۆ وەرگرتنی چارەسەری پزیشکیی بریندارەکان رەوانەی نەخۆشخانەکانی چەمچەماڵ و سلێمانی کراون بەڵام یەکێک لە بریندارەکان بەهۆی سەختی برینەکەیەوە ئەمڕۆ گیانی لەدەستداوە.

به‌رێوبه‌ری ناحیه‌ی قه‌ره‌هه‌نجیر ئه‌وه‌شی بۆ ئێن ئارتی ئاشكرا كردوه‌،  بە پێی زانیارییە سەرەتاییەکان پێدەچێت هۆکاری رووداوەکە بۆ کێشەی کۆمەڵایەتی بێت، له‌ ئێستادا  لەلایەن پۆلیسی قەرەهەنجیرەوە پەڕاوی لێکۆڵینەوە بۆ رووداوەکە کراوەتەوە و لێکۆڵینەوەکان بەردەوامن.

 ن.ش