بەشی بەڵگە ‌و تاوانی سلێمانی دەچێتەوە ماڵی سێوان قادر

دوو شەممە, 07 کانونی دووەم 2019 07:53

بەڕێوەبەری پۆلیسی چەمچەماڵ رایگەیاند، بەشی بەڵگە‌ و تاوانی سلێمانی بۆجاری دووەم بەڵگە لەسەر ئاگرەكەی ماڵی سێوان قادر كۆدەكاتەوە ‌و دەشڵێت "ئەو ژنەی وەك شاهید بانگکرابوو، كەیسەكەی گۆڕدرا بۆ تۆمەتبار".

عادل ساڵح، بەڕێوەبەری پۆلیسی چەمچەماڵ بە رووداوی راگەیاند، تاوەكو ئێستا لێكۆڵینەوەی ورد لە رووداوی ئاگرەكەی ماڵی كۆچكردوو، سێوان قادر بەردەوامە‌، گوتیشی "بەشی بەڵگە‌ و تاوانی سلێمانی بۆ جاری دووەم هاتنەوە چەمچەماڵ بۆ كۆكردنەوەی بەڵگە ‌و زانیاری وردتر لەسەر هۆكاری ئاگرەكە، تاوەكو ئێستاش كەیسەكە بەكراوەیی ماوەتەوە".

بەڕێوەبەری پۆلیسی چەمچەماڵ باسی لەوەشكرد، ئەو ژنەی كە پێشتر وەكو شاهید هاتە بەردەم دادوەر،‌ ئێستا كەیسەكەی گۆڕدراوە و وەك تۆمەتبارێك لێكۆڵینەوەی لەگەڵدا دەكرێت، جەختیشی کردەوە لەوەی "هێشتا هاوسەری كۆچكردوو، سێوان قادر نكوڵی لەوە دەكات ئەو هۆكاری ئاگرەكە بووبێت، لێكۆڵینەوەش بەردەوامە".

شەوی 16-12-2018 لە گەڕەكی ئاسوودەی چەمچەماڵ بەهۆی كەوتنەوەی ئاگر لە ماڵەكەیدا، ژنێك بەناوی سێوان ‌و سێ‌ منداڵی سووتان؛ سێ منداڵەكەی دەستبەجێ مردن و خۆیشی 90%ـی جەستەی سووتا، بەرەبەیانی رۆژی 24-12-2018 خۆشی كۆچی دواییكرد، بەڵام پێش گیانلەدەستدانی داوای کرد کەیسەکەی دانەخرێت و مافی نەفەوتێت، ئێستا پۆلیس هاوژینەکەی سێوان ‌و ژنێكی دیكەی وەك تۆمەتباری رووداوەكە دەستگیركردووە.