كۆسرەت ڕەسوڵ داوای یاسایی لەسەر د.بەختیار ئەمین تۆمار دەكات

21/01/2019 - 15:30 بڵاوکراوەتەوە لە هەواڵ/كوردستانی

 


نوسینگەی ڕۆژنامەوانی كۆسرەت رەسوڵ جێگری سكرتێری گشتی یەكێتی نیشتمیانی لەسەر ڕوداوی هێرشكردنە سەر د.بەختیار ئەمین لە لایەن چەند پێشمەرگەیەكی یەكێتیەوە، ڕونكردنەوەیەكی بڵاوكردەوە و تیایدا ڕایدەگەیەنێت لە بەرامبەر تۆمەتباركردنی جێگری سكرتێری گشتیدا، سكاڵای یاسایی تۆمار دەكەن.


لە ڕونكردنەوكەدا هاتووە" چەند ڕۆژێكە ڕووداوی دەمەقاڵێیەكی دكتۆر بەختیار ئەمین و چەند پێشمەرگەیەكی یەكێتی نیشتمانی لەسەر جادە بووەتە قسەوباسی گەرمی هەندێك كەناڵی ڕاگەیاندنی چەند لایەنێكی سیاسی، ئەم بابەتە هەتا ئێرە بابەتێكی ئاسایی‌و سادەیەو دەكرێت یاسا ڕۆڵی خۆی لە چارەسەركردنیدا بگێڕێت و سەرپێچكار سزای خۆی وەربگرێت".


هەروەها هاتووە" ئەوەی جێگای سەرنجە، كە دكتۆر بەختیار بەبێ هۆ دەستی داوەتە هەڵمەتێكی تەشهیرو بوختانكردن لەسەر كۆسرەت ڕەسوڵ‌و كوڕەكانی، لە كاتێكدا، كە بەڕێزیان دوورو نزیك هیچ پەیوەنددیان نە بە بابەتەكەو نە بەلایەنی شەڕەكەوە نییە، تەنیا ئەوە نەبێت كە بەڕێزیان وەك جێگری سكرتێری گشتی (ی.ن.ك) بەرپرسی هێزی پێشمەرگەی (ی. ن. ك)ە، كە ناكرێت لە هەر جێیەكی ئەم كوردستانە بەرینە پێشمەرگەیەك لە دەرەوەی ئەركی فەرمی خۆی تووشی دەمەقاڵی و كێشەی لابەلا ببێت، جێگری سكرتێری گشتی لێی بەرپرسیار بێت".


لە كۆتاییدا نوسراوە ”وەك نووسینگەی كۆسرەت ڕەسووڵ ھەموو ڕێكارێكی یاسایی دەگرینە بەر بۆ خستنەڕووی ڕاستییەكان بۆ ڕای گشتی و كۆتایی ھێنان بەو ھەڵمەتە چەواشەكارییانە و داوای یاسایی لەسەر لایەنی بەرامبەر تۆمار دەكات و بۆ لێپێچینەوە و گرتنەبەری ئیجرائاتی یاسایی لەگەڵ لایەنی بەرامبەر“.