پارە بۆ مووچە ئامادەكراوە

21/03/2019 - 21:50 بڵاوکراوەتەوە لە هەواڵ/كوردستانی

 

 

پارەی پێویست بۆ مووچەی فەرمانبەرانی هەرێم لەبەغداوە ڕەوانەكراوە، ئەندامێكی لێژنەی دارایی ئەنجوومەنی نوێنەرانیش زانیاری زیاتر دەخاتەڕوو، ڕاشیدەگەیەنێت، جگە لەمووچەی مانگی سێ، پارەی مووچەی مانگەكانی (1 – 2) ی ئەمساڵیش نێردراوە، دەشڵێت: لەهەفتەی یەكەمی هەموو مانگێك مووچە دەنێردرێت.

(د. ئەحمەد سەفار) ئەندامی لێژنەی دارایی ئەنجوومەنی نوێنەران ڕایگەیاند، بەگوێرەی ڕێوشوێنەكان لەهەفتەی یەكەمی هەموو مانگێكەوە دەست بەناردنی پارە دەكرێت، بەگشتی ناردنی پارەكە تا (10) ی مانگ زیاتر دواناكەوێت، بەڵام ئێستا جۆرێك لەجۆرەكان سیستەمی دابەشكردنی مووچەی وەزارەتی دارایی گۆڕانكاری بەسەرداهاتووەو بەرچاو ڕونی تەواونییە لەسەر خەرجكردنی مووچە.

سەبارەت بەناردنی مووچەی فەرمانبەرانی هەرێم و دابەشكردنی بۆ مووچەی مانگی (یەك) ی ئەمساڵ، ئەو ئەندامەی لێژنەی دارایی ئاشكرایكرد، مووچەی مانگی سێ لەلایەن حكومەتی عێراقەوە نێردراوە، جگە لەوەش مووچەی مانگەكانی (1 – 2) ی ئەمساڵیش بەتەواوی نێردراوە، بۆیە پارەی پێویست ئامادەیە بۆ مووچە.

(د. ئەحمەد سەفار) بۆ ئێس ئێن ئێن ئەوەشی وت: هەفتەی داهاتوو دەچنەوە بەغداو زانیاری لەسەر شێوازی ناردنی مووچەو وادەی دیاریكراوی خۆی بۆ هەرێم بڵاودەكەنەوە.