موچه‌ی شه‌ش مانگ بۆخانه‌نشینان خه‌رج ده‌كرێت

27/04/2019 - 15:09 بڵاوکراوەتەوە لە هەواڵ/كوردستانی
ئەگەرچی زیاتر لە ساڵێكە موچەی خانەنشینان لە دواوەی موچەی فەرمانبەرانی هەرێمە و بەڕێوەبەری گشتیی خانەنشینی پێشمەرگە لەسلێمانی ڕونكردنەوە لەبارەی خەرجكردنی شایستەی دارایی ئیكرامیە بۆ ئەو فەرمانبەرو هێزە ئەمنیانە دەدات كە مامەڵەی خانەنشینیان بەكۆتاهاتوە، ڕاشیدەگەیەنێت، ئەگەر مامەڵەیان بەكۆتا هاتبێت موچەی شەش مانگەكەیان بەسەریەكەوە پێدەردێت.
شێخ عەزیز محەمەد بەڕێوەبەری گشتیی خانەنشینی پێشمەرگە لەسلێمانی ڕایگەیاند: ئەوكەسانەی خزمەت و ڕاژەیان بەكۆتادێت وخانەنشیندەكرێن، دوای ئەوەی مامەڵەكانیان تەواودەكرێت نوسراویان لەفەرمانگەكانی خۆیانەوە بۆ بەڕێوەبەرایەتی گەنجینە بۆ دەكرێت و موچەی شەش مانگیان بەیەكەوە بەسەرجەم دەرماڵەوە بۆ خەرجدەكرێت.
ئەوەشی ئاشكرا كردوە، هەر فەرمانبەرێك كە خزمەت و ڕاژەی بەكۆتادێت، دەبێت فەرمانگەكەی خۆی موچەی ئەو شەش مانگەی بەیەكەوە بۆ خەرجبكرێت، ئەگەر ئەوەش نەكرابێت، ئەوا فەرمانگەی لێی بەرپرسە نەك بەڕێوەبەرایەتی گشتی خانەنشینی.
بەرپرسەكەی خانەنشینی پێشمەرگە ئەوەشی راگەیاندوە، "میكانیزمی خەرجكردنی ئیكرامیەی خانەنشینی فەرمانبەران جیاوازە لەگەڵ هێزە ئەمنیەكان، بەوپێیەی ئیكرامیەی خانەنشینی پارەكەی زۆرترەو نوسراویان بۆ دەكرێت بەڕێوەبەرایەتی گشتی خانەنشینی و دواتر ئاراستەی وەزارەتی دارایی دەكرێت، ئەوكات پارەكەیان بۆ خەرجدەكرێت، ئەوەش بەچەند قیستێك خەرجدەكرێت بەوپێیەی ئەو ئیكرامیەی ئەوان زیاترە بەراورد بەفەرمانبەرانی مەدەنی".
شێخ عەزیز محەمەد ئەوەشی بەتۆری هەواڵی سلێمانی راگەیاندوە، "ئێستا هیچ گرفتێك لەبەردەم خەرجكردنی ئەو ئیكرامیە نەماوەو ئەوكەسانەی پێشتر بۆیان خەرجنەكراوە پێیاندەردێت".
ن.ش