یەكێتی زانایان داوایەك ئاڕاستەی كەناڵەكانی راگەیاندن دەكات

14/05/2019 - 08:46 بڵاوکراوەتەوە لە هەواڵ/كوردستانی

 

 

 

یەكێتی زانایانی ئایینی ئیسلامی كوردستان لەبارەی وتاری ئاینیەوە داوایەك ئاراستەی كەناڵەكانی ڕاگەیاندن دەكات، هۆشداریشدەدات لەوەی‌، هەندێكجار بەرنامەكان ئامانجی خزمەتكردن ناپێكن و دەبنە مایەی دروستكردنی ئاڵۆزی و دڵەڕاوكێ.

لەبەیاننامەیەكی یەكێتی زانایانی ئایینی‌ ئیسلامی كوردستاندا ئاماژە بەوەكراوە، هەندێكجار بابەت و بەرنامەكان لەمانگی ڕەمەزاندا، ئامانجی خزمەتكردن ناپێكن و دەبنە مایەی دروستكردنی ئاڵۆزیی و دڵەڕاوكێ و وروژاندنی هەندێ شت كە لەگەڵ سروشتی كۆمەڵگەو چوارچێوە كۆمەڵایەتییەكان یەكناگرێتەوە.

یەكێتی زانایان لەبەیاننامەكەیدا تكا دەكات، دەزگاو كەناڵەكانی ڕاگەیاندن بەتایبەت بەرنامەكانی ئایینی، بەئاراستەی واقعی كۆمەڵگەی كوردی و بەڕەچاوكردنی هەستی دینداریی و پاراستنی ئاشتەوایی كۆمەڵایەتی خزمەتكردن بەرن، شتێك نەوروژێنن لەجیاتی خزمەت ببێتە هۆی نیگەرانی و كاردانەوەی ناتەندروست.

ئەوەشخراوەتەڕوو، پێویستە مامۆستایانی ئایینی لەكاتی بەشداریكردنی بەرنامەكان ڕەچاوی لایەنی پیشەیی و پێگەیان بكەن و بەگوێرەی‌ پێوەرە گشتی و پەیوەستەكانی كاری مەلایەتی لەگەیاندنی پەیام و ڕێنمایی و ئەحكامە جوانەكانی ئیسلام، بەو ئاڕاستە زانستیە هەنگاوبنێن كە گەورە زانایانمان چوارچێوەیان بۆ داڕشتوە.

داوا لەمامۆستایانی‌ ئایینی‌ كراوە، خۆیان بەدوربگرن لەفەتوادان و ئیجتیهادی میزاجی و مكوڕبوون لەسەر بۆچونێك كە بۆچوونی‌ جیاوازی‌ زانایانی لەسەرە، هەر هەڵەیەك، زۆر دەكەوێت لەسەر هەمولایەك.