رووناكی شاشەی مۆبایل چۆن بێت باشە ؟؟

25/07/2019 - 09:21 بڵاوکراوەتەوە لە هەواڵ/تەكنەلۆژی

 

 

ئەو رووناكییە شینەی لە شاشەی مۆبایل و تابلێت و كۆمپیتەرەوە دەردەچێت، یارمەتی خوێنەر دەدات بۆ ئاسانی خوێندنەوەو بینین ئەو شاشانە لە رۆژدا، بەڵام هاوكات كاریگەری خراپیان بۆ سەر تەندروستی مرۆڤ هەیە بۆ سەر چاوو مێشك و كێشەی تریش دروست دەكەن.

دیزاینەرەكانی ئەو ئامێرە ئەلیكترۆنیانە كە ئەو شاشانەیان دروست كردووە بۆ ئەوەی لەكاتی بەر رۆژو زۆر رووناك بتوانرێت بەكار بهێنرێن، بەڵام لەكاتی شەوو لە تاریكیدا زیانی گەورەیان بۆ سەر تەندروستی دەبێت.

سروشتی لەشی مرۆڤ وایە كە لەگەڵ رووناكی رۆژ كارلێك دەكات و ئاگایی زیاتر دەبێت، بەڵام بە شەوو رووناكی نزم دەحەسێتەوەو خەواڵوو دەبێت، بۆیە ئەو رووناكییە شینەی لە شاشەی ئەو ئامێرە ئەلیكترۆنیانەوە دەردەچێت كێشەو شێوان بۆ مێشك دروست دەكەن، كاتێك كاریگەرییەكی بە هاوشێوەی رووناكی بەیانی هەیە كە مێشك هان دەدات بۆ دەرنەدانی هۆڕمۆنی میلاتۆنین كە تایبەتە بە هاندانی لەش بۆ خەوتن، ئەوەش كار دەكاتە سەر گۆڕینی شێوازی خەوتن و دەركەوتنی كاریگەری گەورە بۆ سەر تەندروستی مرۆڤەوە. 

رووناكییە شینەكە كار دەكاتە سەر مێشك و دەبێتە هۆی كەڵەكەبوونی دەماری كە سەختی وەڵامدانەوەو خەوتن دروست دەكات، بۆیە بوونی كێشە لە شێوازی خەوتن دەبێتە هۆی لاوازبوونی یادەوەری، هەروەها ئەو رووناكییە كاریگەری نەرێنی بۆ سەر توانای تەركیزكردن لەكاتی خوێندنەوەو فێربوون هەیە، جیا لە گۆڕینی شێوازی خەوتن و خواردن كە قەڵەوی دروست دەكەن.

هەروەها زۆر بەكارهێنانی ئەو رووناكییە بەشەو كاریگەری بۆ سەر نەخۆشییەكانی شێرپەنجەو پرۆستات هەیە، هەرچی چاوەكانە دەبێتە هۆی لێڵبوونی هاوێنەی چاوو تێكچوونی تۆڕی چاو، بۆیە بۆ نەهێشتنی ئەو كێشانە دیزاینەری پڕۆگرامەكانی مۆبایل بیریان لە گۆڕینی توندی رووناكییەكە لە شەودا كردۆتەوە كە رووناكییە شینەكە لە شەودا ون دەكات. 

هاوكات توێژینەوەیەكی فەرەنسی – هۆڵەندی گەیشتە ئەو ئەنجامەی كە بەركەوتنی شەوانە بۆ ماوەی سەعاتێك بۆ رووناكی شینی شاشەی ئامێرە ئەلیكترۆنییەكان، خواستی خواردنی شیرینی و خواردنەوە شیرینكراوەكان زیاتر دەكات و ئەوەش دەبێت هۆی زیادبوونی كێش و قەڵەوی و كلۆربوونی ددان.

توێژینەوەكە كە بە هاوبەشی هەردوو زانكۆی (ستراسبۆرگ) ی فەرەنسی و ئەمستردامی هۆڵەندی ئەنجام دراوە روونی كردەوە كە لە تاقیكردنەوە لەسەر مشك لە تاقیگە دەركەوتووە كە ئەو رووناكییە شینە شەوانە وا دەكات بۆ رۆژی دواتر ئارەزووی خواردنی ناتەندروست بكەن و بەو شێوەیە ئاستی شەكر لە خوێنیان زیاتر بووە.

توێژەران چوار جۆر خۆراكیان لەپێش مشەكەكان داناو بۆیان دەركەوتووە، نێرەكان كاتێك بەشەو دووچاری بەركەوتنی رووناكی شین كرابوونەوە، زیاتر خواستی خۆراكی شیرینیان هەبوو بە بەراورد بەوانەی كە بەری نەكەوتبوون، بۆیە لەو تاقیكردنەوەو لە توێژینەوەی پێشتریش دەردەكەوێت كە زۆر بەكارهێنانی مۆبایلی زیرەك شەوانە دەبێتە هۆی قەڵەوی و زیادبوونی كێش، وەك رۆژنامەی (دەیلی مێل) ی بەریتانی ئاماژەی پێكردووە.

لەبارەی هۆكارەكەیەوە رۆژنامەكە دەڵێت، ئەو رووناكییە شینەی مۆبایل كار دەكاتە سەر سەعاتی بایۆلۆجی لەشی مرۆڤ و وا دەكات زیاتر ئارەزووی خواردنی شیرینی بكات.

ئەژین عەبدولڵا – هەولێر