نۆكیاو كۆداك بۆچی شكستیان هێنا ؟؟

پێنج شەممە, 09 تشرینی دووەم 2017 07:14

 

 


شكستهێنان گەورەو بچووكی بۆ نییە، تەنانەت بازرگانانی گەورەو لێهاتوویش دەبێ زۆر وشیاربن و ئاگایان لەوەبێ كە كارو كاسپییەكەیان كەم و كوڕی تێ نەكەوێت ئەگینا ئەوەندەی پێ ناچی كە دەهۆڵی هەڵشكانیان لە جیهان دەنگ دەداتەوە.

كەسێك كە هەنگاوێكی بچووك هەڵدەگرێ ئەگەر سەركەوێ سەركەوتنەكەی بچووكەو ئەگەریش تووشی شكست بێ شكستەكەی بچووكە، بەڵام ئەوەی كە كاری قورس و یەكجار گەورە دەكات ئەگەر سەركەوێ سەركەوتنەكەی دەیگەیەنێتە لووتكەی ناوبانگ و سامان و ئەگەریش شكست بخوات دەچەقێتە نێو زەلكاوی قەرزداری و هەڵشكان و ناوزڕان.
لێرەدا ئاماژە دەكەینە دوو كۆمپانیای گەورەو بەناوبانگی جیهانی كە شكستەكەیان وەك ناوبانگەكەیان گەورە بوو.

نۆكیا ... برەندی نۆكیا سەردەمانێك باشترین مۆبایل بوو، ماركەو كۆمپانیاكانی دیكەی مۆبایل لە چاو نۆكیا هەر هیچ نەبوون، كڕیاران و خەڵكی ئاسایش هەر بۆچوونیان وابوو و پێیان وابوو كە هیچ مۆبایلێكی دیكە ناتوانێ جێگەی نۆكیا بگرێتەوە، بەڵام كاتێك كاربەدەستانی كۆمپانیای نۆكیا دڵخۆش بەو پلەو پێگەو ناوبانگە‌ بوون و كەمتر بەرەو لای تەكنۆلۆژیای نوێ و توێژینەوەی جیهانی پێوەندی و تەكنۆلۆژیا ڕۆیشتن و لە هەمووی گرینگتر كۆمپانیاكانی دیكەی چاڵاك لە بواری مۆبایلیان بە هیچ زانی، زۆری پێ نەچوو كە كۆرییەكان و ئەمریكییەكان ئەو پلەو پێگەیان لەژێر پێی نۆكیا كێشایە دەرەوەو ئێستاش مەیدان هەر لە‌ دەستی ئەواندایە.

كۆداك ... كۆمپانیای كۆداك پاش (133) ساڵ چاڵاكی بێ وچان و دەنگ و ناوێكی بەربڵاو و جیهانی ڕایگەیاند، كە هەڵشكاوە. كۆداك ساڵەهای ساڵ بۆ هەموو خەڵكی جیهان بە مانای كامێراو عەكس و وێنە گرتن و بیرەوەییەكانی ژیان بووە، برەندێك كە (133) ساڵ كات و ساتە تاڵ و شیرینەكانی بەملیۆنان مرۆڤی تۆمار كردووە، ڕەنگە (133) ساڵ ئەوەندە ماوەیەكی زۆر بوو كە هەستی ئەبەدی و تاهەتایی بوون بە كۆمپانیای كۆداك بدات‌، بەڵام ڕەوتی گۆڕانكاری لە جیهانی تەكنۆلۆژیا خێراترو بێ بەزەییتر لەوە شتانەی‌ كە كۆداك بیری دەكردەوە.

كۆداك هەڵشكا، چونكە چاوی بەستبوو بە ڕووی ڕاستییەكانی جیهان، كۆداك بایەخی نەدابوو بە كۆمپانییە بچكۆڵە تازە سەرهەڵداوەكان كە باشتر لەو داهێنان و نوێكاریان دەزانی و توێژینەوەیان دەكرد تاكو بزانن خەڵك و بەتایبەت بەرەی لاو سەلیقەو هۆگرییان چیەو بەرهەمەكانیان ڕۆژبەڕۆژ باشترو سەرنج ڕاكێشتر دەكرد.
هەر ئەو بێئاگایی و كەمتەرخەمییەی كۆداك بووە هۆی ئەوەی دوای (133) ساڵ تەكتازی لەسەر هەسپی تاك و بێ وێنە بوون داكەوێتە خوارەوە.

 

ئـ . كـ