پارێزگای هەڵەبجە !

۱۱ـ٦ـ۲۰۱٦ ساڵێک تێدەپەڕێت بەسەر دەست بەکاربونی پارێزگاری هەڵەبجەدا

بڕیاری بەپارێزگابونی هەڵەبجە لانی کەمی نرخاندنی قوربانیەکان و مێژووی ئەو شارەبوو لەڕوی مەعنەویەوە

ئەگەرچی زۆریش دواکەوت بەڵام لەکاتی خۆیدا دڵی هەموو هەڵەبجەیی و دۆستانی لەتەواوی کوردستان و جیهان خۆشکرد و هەر ئەو ساتە و لەچەند کاتژمێرێک دوای واژوی بڕیارەکە لەکەناڵی سپێدەوە وتمان و هەموو دڵسۆزانیش لەگەرمەی ئەو دڵخۆشیەدا بەگومانەوە وتمان هیوادارین تەنها مرەکەبی سەرقاغەز و بانگەشەی هەڵبژاردن و موزایەدەی سیاسی نەبێت !

شتێکی نهێنیمان نەوتووە ئەگەر بڵێین تا ئێستا جگە لە مورەکەبی سەر کاغەز شتێکی تر نیە و هەر لەبەر ئەوەیشە شەڕی زۆربەی دڵسۆزانی ئەوشارە هێشتا لەسەر کاغەزە و هێشتا شەڕمانە بزانین لەپەڕاوە فەرمیەکان و لەکەناڵەکانی ڕاگەیاندن و لەزمانی سیاسیەکانەوە ئەنوسن قەزا یان پارێزگا ؟
ئەڵێن هەڵەبجە یان پارێزگای هەڵەبجە ؟
ئەڵێن هەرچوار پارێزگاکە یان هەرپێنج پارێزگاکە ؟

هێشتا شەڕی وشە و مورەکەبی سەرقاغەزمانە چونکە بەجدی هێشتا پرسی پارێزگای هەڵەبجە قۆناغی مورەکەبی سەر کاغەزی تێنەپەڕاندووە

کارەساتەکە لەوێوە دەستی پێکرد پرسی بەپارێزگابونی هەڵەبجە لەڕێزنانێکی قوربانیەوە کرایە پرسێکی موزایەدەو بانگەشەی پێش هەڵبژاردن و لەوەیش خراپتر خەریک بوو لە بابەتێکی ڕێزلێنانەوە ئەکرایە پرسێکی جوگرافی و ئەکرایە ماددەیەکی تێکدانی نێوان هەڵەبجە و هەموو شارەکانی دیکە !

لەوەیش کارەساتتر ئەوەبوو کە هەر ئێوارەی بەپارێزگابونی لەبەرنامەیەکی تایبەت بەوکارە لەکەناڵی سپێدەوە هاوارم بۆکرد کەپێویستە پارێزگای هەڵەبجە وەک پارێزگایەکی نمونەیی هەڵسوکەوتی لەگەڵ بکرێت و ئەو هەڵانەی لەپارێزگاکانیتر هەیە لێرە لەبناغەوە دوبارەی نەکەینەوە و بەبێ ستەمکردن و بە کاری بەکۆمەڵ هەموو هێزەکان پێکەوە خزمەتی بکەن و بەدوری بگرن لەململانێی حزبی و دەست بەرداری قۆرغکاری ببن بەڵام بەداخەوە هەر لەڕێوە هەڵە ستراتیجیەکە کرا و پارێزگای هەڵەبجە کرایە پاشکۆی ڕێککەوتنی گۆڕان و یەکیەتی لەپارێزگای سلێمانی

هەنگاوەکانی بەپارێزگابونی هەڵەبجە سەرەوژێرکرایەوە
لەجیاتی ئەوەی سەرەتا ئەنجومەنی پارێزگا ئامادەبکرێت و دواتر پارێزگار لەبەردەم ئەو ئەنجومەنەدا دەست بەکاربێت و دواتریش پێکەوە بەڕێوەبەرە گشتیەکان بنیات بنرێن وەک سەرەتاییترین ڕێکاری بەپارێزگابون و دواتر ئەم دامەزراوە فەرمیانە بەهاوکاری ڕێکخراوە مەدەنیەکان و دڵسۆزانی هەڵەبجە لە کوردستان و عێراق و جیهان کاربکرێت بۆ خزمەتکردنی
پارێزگاری هەڵەبجە وەک پاشکۆی ڕێککەوتنی پارێزگای سلێمانی دەست بەکار بوو پێش ئەوەی هیچ هەبێت و تا ئێستاشی پێوەبێت نەک ئەنجومەنی پارێزگای هەڵەبجە دروست نەبووە بەڵکو تا ئێستاش سێ هێزی سەرەکی هەڵەبجە گۆڕان و پارتی و کۆمەڵ ناوەکانی خۆیان ڕادەست نەکردووە !

بزوتنەوەی گۆڕان تاوانباری سەرەکی ئامادەنەکردنی ئەو ناوانەیە بەو ئیعتیبارەی کە پارێزگار هی ئەوە و دەبوو لەهەموولایەک زیاتر بۆی گرنگبوایە سەرکەوتنی کەدڵنیام ئەگەر لیستی گۆران ناوەکانی ئامادەبوایە هەر هێزێکیتر کەمتەرخەمی بنواندایە لە ئامادەکردنی ناوی ئەندامانی ئەنجومەنی پارێزگا و ڕێگربوایە ئێستا بە هەزارویەک ناو ناتۆرە ناوزڕاودەکرا و تاوانبار دەکرا بەپاشکۆیەتی پارتی و تاوانباردەکرا بە هەوڵدان بۆ شکست پێهێنانی پارێزگای هەڵەبجە کە پارێزگارەکەی گۆڕانە

ئێستاش ناوی ۱٤ کاندیدی ئەنجومەنی پارێزگا ئامادەیە لە ۲۵ئەندامەکە و زۆرینەیە بەڵام پارێزگاری هەڵەبجە لەژێرفشاردا ڕێگرە لەناردنیان بۆ وەزارەتی ناوخۆ و دەست بەکاربون و دەستکردن بەڕێکارەکانی بەپارێزگابونی هەڵەبجە و دامەزراندنی لیژنەکان تا ئەوکاتەی هێزەکانیتریش ناکۆکیەکانی نێوخۆی خۆیان کۆتایی پێدێنن و ناوەکان دەنێرن

سەرەڕای هەموو ئەو قەیرانانەی دوای بڕیاری بەپارێزگابونی هەڵەبجە هاتونەتە ئاراوە و لەسەروو توانای هەڵەبجەوەن بەڵام زۆر هەنگاو و کاری گرنگ و ستراتیجی دەکرێ بکرێت کەنەپارەی دەوێت و نەکەسی دەوێت تەنها و تەنها ئیرادەیەکی بەهێزی دەوێت لەبنیاتنانی بناغەیەکی دروست لەبەپارێزگابونی هەڵەبجەدا و زۆرێکیشی بە لایەنە سیاسیەکانی نێوخۆی هەڵەبجە دەکرا و دەکرێت کەبەداخەوە ئێستا ڕێگری سەرەکین

بۆ من شەرەفمەندیەکی گەورەیە ناوم بچێتە نێو لیستی ئەندامانی یەکەمین ئەنجومەنی پارێزگای شارەکەم لەسەر لیستی یەکگرتووی ئیسلامی کوردستان کە پێش نزیکەی ساڵێک دوای ئەوەی لیژنەیەکی پسپۆر چاوپێکەوتنی لەگەڵکردین و دواتریش بەهەڵبژاردن و دەنگێکی زۆرباش بەزۆرینەی دەنگی ئەندامانی ئەنجومەنی سەرکردایەتی دەڤەر بوومە کاندیدی یەکگرتوو
بەڵام
ئەوە پێش نزیکەی ساڵێک بوو کە بەدڵ گەرمیەوە بۆ خزمەتکردنی هەڵەبجە و بەشداریکردن لە دامەزراندنی بناغەی پارێگای هەڵەبجەبوو ئێستا دوای ساڵێک لێتان ناشارمەوە هەست بەشەرمەزاری دەکەم لەم بێدەنگی و بێباکیەی هێزەکان بەتایبەت ئەوانەی ڕێگرن لەهەنگاوەسەرەکیەکانی ئەو پرۆسەیەدا

کاتی ئەوەیە بەجورئەتەوە قسە لەسەر ئەو پرسە بکرێت و ئەندامان و دڵسۆزانی ئەو سێ هێزە لەهەڵەبجە پێش خەڵکیتر دەنگ هەڵبڕن و ناڕەزایەتی بنوێنن چونکە پرسەکە گەیشتووەتە ئاستێکی بەرزی شەرمەزاری