وەزیرەئیسلامیەكان,كەی ڕۆژوی بێ‌ دەنگیتان دەشكێنن؟!

ئاشكرایە دەركەوتنی ئەو گزی و فزیەی كە ئێستادا لەبواری نەوت و سیاسەتی گشتی دارایی هەرێم دا هەیە رەنگە لەهەمووكات زیاتر بیت , ئەو ناعەدالەتی و نادادگەریەی كە لە دابەشكردنی داهاتی سەرخان و ژێرخانی ئەم مەملەكەتەدا هەیە هەمووسنورەكانی تێپەڕاندووە!
ئاشكراشە ماوەی چەند مانگێكە نرخی نەوت بەردەوام لە هەڵكشاندایە بەجۆرێك نرخەكەی گەیشتۆتە دووهێندەی یەكەمجاری, وەلێ‌ بەداخەوە ئەوەی كە كاری لێ‌ نەكراو گۆرانكاری تێدا نەكرا پاشەكەوتی زۆرەملێی موچەی فرەمانبەران بوو !!! سەرۆكی حكومەتیش زۆر بەراشكاوانە ئاماژەی بەوەكرد كە لەئێستادا ناتوانن گۆرانكاری لەبری پاشەكەوت دا بكەن, كە ئەمەش ئەوپەڕی بێ‌ متمانەیی دەسەڵاتی ئەم كابینەیەی لای خەڵكی ئەم هەرێمە تۆختر كردەوە.
ئەوەی كە مەبەستمە قسەی بكەم بێ‌ دەنگی ژمارەیەك وەزیری ئیسلامیە لەم كابینەیەدا ,كە تۆزقاڵێك حساب بۆ هەست و نەستی خەڵكی ئەم مەملەكەتە ناكات.
رەنگە بێ‌ دەنگی وەزیرەكانی پارتی و چەند لایەنێكی تر خزمەت بە ئەجینداو كاری ئەوان بكات , چونكە دوورونزیك سودمەندن لەفرۆش و داهاتی نەوت ,جیاواز لەلایەنەئیسلامیەكان و رونتر بڵێم سێ‌ لایەنە ئۆپۆزسیۆنەكەی جاران, بەڵام زەحمەت نەبێت پێمان ناڵین وەزیرە ئیسلامیەكانی كابینەكەی كاك نێچیرڤان بارزانی ئەم بێ‌ دەنگی و بێ‌ هەڵوێستی و بێ‌ قسەیەتان لەئاست ئەم هەموو نادادگەری و ناعەدالەتیی و ناشەفافیەدا لە بەرژەوەندی كێدایە ؟!
ئێوە ئەگەر تەنها بۆ مانەوە لەپۆستەكانتان ئەم بێ‌ دەنگیەتان هەڵبژاردبێت ئەوا سبەینێ‌ لەبەردەم دادگای خواو دادگای ویژدانی خۆتاندا وەڵامتان چی دەبێت؟.
من دەپرسم ئەم بێ‌ دەنگی و بێ‌ هەڵوێستی یەی ئێوە چ خزمەتێكی حزبەكانتان و خەڵكی برسی ئەم هەرێمە دەكات؟! ئێوە كەئێستا تارادەیەك نزیكن لەناوەندی بریارەوە هیچ نەبێت خۆ دەتوانن لە كۆبونەوەكانی ئەنجومەنی وەزیران و كۆبونەوەكانی لیژنەی روبەروبونەوەی قەیرانی دارایی دەنگی نارەزایی و دەنگی خەڵك بەرزبكەنەوە و واقیعی تەواوی هەژاری و دەست كورتی خەڵكی ئەم هەرێمە بۆ بریار بەدەستەكانی وڵات رون بكەنەوە, لانی كەم بە وتارێك بە لێدوانێكی رۆژنامەوانی خۆتان بێبەری بكەن لەم سیاسەتی كاركردنەی ئێستای حكومەتی هەرێم.
لێرەوە جێی خۆیەتی وەڵامی پرسیاری هەوادارانتان و خەڵكی كوردستان بدەنەوە كەی رۆژوی بێ‌ دەنگیتان لەئاست ئەم هەمووە قەیرانە دەشكێنن و ئەوەی لەناختان دایە دەربارەی دۆخەكە بێ‌ ترس لە لەدەستدانی پۆستەكانتان راستگۆیانە بەخەڵكی دەلێن, پێتان وانیە ئەگەر تا ئێستا رۆژوی بێ‌ دەنگیتان نەشكاندبێت ئیدی لەئێستاوە كاتی ئەوەیە یان خۆتان بێ‌ بەری بكەن لەئەجینداو كاری ئەم كابینەیە یان وەك بەشێك لەئەندازیارانی ئەم دۆخە ئێوەش خۆتان بناسێنن؟.