ئیرهاب تەنها بزاوتێك نییە لەهەرێمێكی جوگرافی دیاریكراودا كاری كردبێت و دەور و تەئسیریشی لەسەر ڕێژەیەكی دیاریكراوی خەڵكی هەبووبێت، بەو ئەندازەیەش كۆتایی بێت، نەخێر ئیرهاب‌و تیرۆری پەلی بۆ هەموو گۆشەنیگایەكی دونیا ناوە، لەهەر پارچەیەكیش شێوازو ئوسلوبی تایبەتی خۆی هەیە.

لێرەوە دەبێت بە ناچاری بگەڕێنەوە سەر مێژووی جولانەوە ئیرهابی‌و تیرۆریستیەكان، لەبەرئەوەی بازدان بەسەر مێژووی جولانەوە ئیرهابیەكان و نەخوێندنەوەی فیكر و ئایدیۆلۆژییان، حەقیقەتی زۆر مەسەلەی ئەو تیرۆرو تیرۆریستانمان لێ دەشارنەوە كەئێستاكە وجودیان هەیە‌و بونەتە مەترسێكی حەقیقی لە سەر ئارامی و ئاسایشی زۆربەی وڵاتان، بە تایبەت وڵاتانی رۆژهەڵات كە رووبەرووبونەوەیەكی راستەخۆ هەیە لە نێوان ئەو بزوتنە‌وانەو كۆمەڵگاكانیان، هەروەك نابێت شكل‌و هەقیەقەتی دەسەڵاتدارانی عەرەبیشمان لە یاد بچێت لە رووی حكومكردنی گەلەكانیان، بەڵام لەم دەرفەتەدا گەڕان بە دوای رەگ‌و ریشەی بزوتنەوە تیرۆریستیەكان كاتی زۆری دەوێت، ئەوەی گرنگە ئیشارەتی پێوە بكەین ئەوەیە كە ئیرهاب‌و تیرۆر لە هەر جوگرافیایەك بێت‌و لەسەر هەر نزمێكی ئاینی یان نەتەوایەتی بێت مەشروعیەتی نیەو نەبووە، ئەوەش هۆكاری گەلێ‌ زۆرە، هەر لەوەی كە ئەو بزوتنەوانە هۆكارێكن بۆ كوشتنی بەها ئینسانیەكان‌و لە ناوبردنی بنچینەكانی مافی مرۆڤ، ئەمەش حكومدانی بابەت نوسێك نیە، بەڵكو پوختەی توێژەرانی باری تیرۆرن، كە هەموویان هاوڕان لەسەر نامەشروع بوونی تیرۆر با ئینجا لەسەر هەر ناوێك بێت.

شەڕی تیرۆر ئەمرۆكە خۆی لە شێوازی تۆقاندن و تیرۆركردن و غافڵكوژی دەبێنێتەوە، لێرەوە زۆر گرنگە ئێمە ئاگامان لەو بیركردنەوانەش بێت كە لە شەرعیەتدان بە كارە تیرۆریستەكان و رچەشكاندن بۆ تۆقاندن رۆڵیان هەیە‌و هەبووە، كەوا دەزانم لێرەدا دەسەڵاتدارانی نادیموكراسی‌و خۆسەپێنن بەشی شێریان بەر دەكەوێت، چونكە ئەوان بوونەتە موبەریر بۆ دروست بوونی ئەوان، پاشان دێینە سەر غائیب بوونی بیركردنەوەی تەندروست ئاینی كە ئەمەش دەرئەنجامی پاشەكشێ‌ كردنی رۆشنفكرانە لەبەرامبەر تێزە بێئاگاكانی كۆمەڵگا كە ئەم تێزانە رێگا خۆش دەكات بۆ (زواهیر)ێكی بە ناوی پزیشك بێت فتوای قەتل‌و عامكردنی كۆمەڵگا بدات، ئاخر كاتێك مەرگ دۆستی‌و دڵڕەقی دەبێتە مۆركی مرۆڤەكان، دەبێت ئێمە چاوەڕێی چیبكەین، لە دوای ئەوەش پرۆسەی بە كافر و گومڕاكردن‌و رەوانەكردنی دۆزەخی بە دواوە بێت.

دەبێت ئەوە روون‌و ئاشكرا بێت كە تیرۆریستان كاری یەكەمیان لە سەر زەوتكردن یان پەكخستنی ئازادی‌و ئیفلیجكردنی بووە، لە خەسلەتە هەمووە جولانەوە تیرۆریستیەكان هاوبەشیان هەیە، لێرەوە وا دەكەن بەردەوام ئاگری یاخیبوون و رووبەرووبونەوە لە دەرووندا هەڵگیرسێ‌و بەهاكانی ژیانیش لە ناخدا بەرەوە عەدەم هەنگاو بهاوێژێ، لەم كاتەشدا ژیان لەلای ئەوان ڕووبەڕووی دۆخی مردن یان سستی ویژدان دەبێتەوە، لە كاتێكدا بەردەوام ژیان پشت بە دیالەكتیكی بە ئومێدبوونەوە دەبەستێت، لەوەش تیروریستان بە تەنها نین، چونكە ئەو ناوچەی تیرۆریستان بونەتە ئاغا تیایدا ئاخێنراوە بە شمولییەت‌و خۆسەپاندن، ئەمەش ژینگەیەی زۆر لەبارە تاوەكو ئەو بزوتنەوانە بە تەواوەتی نشونما بكەن..

لەلایەكی دیكەوە بەهۆی خەمساردی تیروریستانەوە، هەرگیز ناتوانرێ‌ لە ناو خۆیانەوە دەنگدانەوە سلبیەكان ببیسترێ و، وەك بڵێ‌ تاوانی ئەوان تەنها هەڵەیەكەو بە ركاتە نوێژێك بە تەواوی دەچێێ‌، ئەمەش تەنها ئەوەی لێدەخوێندرێتەوە كە تیرۆریستان دابڕاون لە خودی ئاینیش، واتا پێویستە سەر لە نوێ‌ ئەلف‌و بێ‌ ئاینیان بەسەر بخوێندرێتەوە، ئەگەرچی ئەوان لەوە دەگەن كە بەم كردەوانانە ڕووت و قووت دەبن لەبەردەم كۆمەڵگا، بەڵام گوێ‌ پێ‌ نادەن، چونكە لەلای ئەوان شەڕ پیرۆزی خۆی هەیە..

ئەوان باس لە ئازادی‌و رزگاری دەكەن لە داگیركەر‌و دەسەڵات، لێرەوەش خۆیان بە ئازادیخواز وەسف دەكەن، بەڵام ئەو ئازادیە تەنها خۆیان دەگەرێتەوە‌و، هەر خۆشیان چوارچێوەی بۆ دادەنێن، لێرەوە نازانن كە ئازادی پارچەپارچەناكرێت و هی گروپێك نییە لە گرووپێكی دیكەی بفڕێنێ، ئازادی پرۆسەیەكی موتەكاملە، بەبێ‌ دەستەبەرنەكردنی گشت ئازادییەكان بێمانادەبێت..

تیرۆریستان تەواو بوونە لە نوێبوونەوەی مەعریفە و پەرەسەندنی هۆشمەندی و كارپێكردنی، بۆیە وێستگەكانی لێكگەیشتن لەگەڵیان زۆر ئاستەمە، ناتوانین گۆشەنیگایەك بدۆزینەوە تا لێوەو بكەوینە گفتوگۆ كردن، ئەوان چەند حەسرەتێكیان لە ناخی خۆیاندا هەڵیانگرتوە‌و بڕیاریان داوە بە هەر جۆرێك بێت قوربانی لەپێناویدا بدەن، كەواتە پرۆژەی تیرۆر پرۆژەی ئەوانەش كە یاخیبوونە لە كۆمەڵگا..