ئەردۆغان لەنێوان غروور و تەوازوعی سیاسیدا

لەسەرەتای سەرهەڵدانی ئاڵۆزییە ناوخۆییەكانی توركیا و بەتایبەت دەستبردنی ئەردۆغان بۆ ئازادی ڕۆژنامەگەری و دەسبەسەركردنی چەندین رۆژنامەنوس و داخستنی چەندین دەزگای میدیایی بزاڤی خزمەت ئەوكات وای لەمن كرد وتارێك بنوسم لەژێر ناونیشانی (ئاكپارتی توركیا بەرەو كوێ‌ دەبات؟).

مەترسییەكانی تێكچونی شیرازەی شێوازی حوكمڕانی ئەردۆغان لەوكاتەوە بەدەركەوت، ئەو توشی غروری سیاسی بوو، ئەو دەردەی كە هەمیشە هیواكان لەبەین دەباو ئاستی پێشكەوتن دەوەستێنێ و هەنگاوەكان لەهەربوارێكدا پەك دەخات.
ئەو ئەگەرچی توركیای ڕزگاركرد لە زۆر قەیران وە توانی ئاستی بژێوی و داهاتی هاوڵاتییەكانی بەرز بكاتەوە و توركیا لە توركیایەك كە خەون بە بونی بە ئەندامی یەكێتی ئەوروپا ببینێت ئەوان ناچار بكات مامەڵەی لەگەڵ بكەن، پەیوەندییەكی داڕماوی دەرەكی ببوژێنێتەوە و لەگەڵ زلهێزانی جیهان هەڵسێ‌ و دانیشێ‌، بەوپێیەی پارتەكەی پاشخانێكی ئیسلامی هەیە بووە رەمزێكی جوان بۆ دەوڵەتداری و هیوایەك بۆ ئیسلامییەكانی تەواوی جیهان و بەتایبەت وڵاتانی جیهانی عەرەبی، هەروەك خۆی بەجۆرێك دەردەخست كە بیەوێت ڕابەرایەتی جیهانی موسوڵمان بكات و خۆبەخاوەنكردنی بۆ كێشە مێژووییەكانی ئەم جیهانە دەردەخست، هەروەك دەروازەیەكی زۆر باشی بەڕوی كێشەی كورد لەو وڵاتە كردەوە و هیواكان بە پرۆسەی چاكسازی زۆر گەورە بوون.
بەڵام هێدی هێدی ئەم پێگە بەهێزە ناوبراوی بە ئاقارێكی تردا برد و سەربەرەو خوار و بە ئاراستەی پێچەوانە ریسەكەی كردەوە بە خوری:
1- تێكدانی پەیوەندییەكانی لەگەڵ زلهێزان بە بیانوی بچوك بچوك.
2- پەكخستن و هەڵوەشاندنەوەی پرۆسەی ئاشتی لەگەڵ كوردان و پەنابردن بۆ بەكارهێنانی هێز بەرامبەر هاوڵاتیانی سیڤیل و كپكردنەوەی دەنگی ناڕەزاییەكان.
3- پەلاماردانی بێرەحمانەی بزاڤی خزمەت و دامودەزگا میدیایی و خزمەتگوزارییەكانیان و سنورداركردنی كاروچالاكییەكانیان.
4- ناكۆكی لەگەڵ هاوكاری بەهێز و عەقڵی گەورە داوودئۆغلۆ كە بێگومان یەكەم پشتوپەناو هاوكاری بوو.
5- دروستكردنی پشێوی ناوخۆیی و كاریگەری ئەو پشێویانە لەسەر بواری گەشتیاری توركیا كە بە سەرەكیترین سەرچاوەی داهاتی ئەو وڵاتە ئەژمار دەكرێت.
6- بێهیواكردن و خەمباركردنی تەواوی ئەو لایەنانەی كە لەناوەوە و دەرەوەی توركیا چاویان لە ئەزمونەكەی ئەو بوو وە وەك ئەزمونێكی سەركەوتوو نمونەیان پێ دەهێنایەوە.
هەموو ئەمانەش كە ئاماژەمان پێكرد هۆكارەكەی تەنها و تەنها غروری سیاسی بوو هیچی تر، ڕاستە پیلان لە دژی هەبوە نكوڵی لێ‌ ناكرێت، بەڵام پەرچەكردارەكانی بۆ ئەو پیلانە دەكرا گونجاوتر بن و حەكیمانەتر تیماری دەردی خۆی بكردایە وەك ئەوەی كە ئێستە وا خەریكە لە غرورەكەی پاشگەز دەبێتەوە و ڕیگەچارەكان بۆ ئاسایی كردنەوەی بارودۆخەكە دەگرێتەبەر.
ئەگەرچی ئەردۆغان هەوڵەكانی لە بواری دەرەوەدا خستۆتەگەڕ بەڵام نابێت ئەوەشی لەبیر بچێت كە لەنیوخۆی توركیاش خۆی كردۆتە خاوەنی دوو كێشەی گەورە كە دەبێت بەزوترین كات چارەسەریان بكات ئەوانیش:
1- وەگەڕخستنەوەی هەوڵەكانی پرۆسەی ئاشتی و دانوستانی جددی لەگەڵ كوردان و تەواوكردنی ئەوەی دەستی پێكدوە لەو بوارەدا.
2- ئاشتەوایی لەگەڵ بزاڤی خزمەت وەك كۆمەڵێكی بنكەفراوان و كاریگەر لە توركیا و پێدانی ئازادی میدیایی و كاری ڕێكخراوەیی بۆ ئەوان و هەركەسی تر كە ئازادی لێ‌ زەوت كرداوە.
پێموایە ئەردۆغان كەسێكی ژیرە و زوو دەرك بە هەڵەكانی خۆی دەكات و هەنگاوەكانی بۆ چاككردنەوەی ئەوەی خراپی كردوە خێراتر دەكات، هەروەك هیوام وایە لە غروری سایاسی خۆی وانەی وەرگرتبێت و ئەمجار تەوازعی سایسی بنوێنێ‌ و رۆژگاریش لە پێشەوەیە و هیوام وایە بەوجۆرە بێت كە من بۆی دەڕوانم.
خالید موحەممەد